Rossiyada og‘ir ahvolda qolgan O‘zbekiston fuqarosi va uning 6 farzandi vatanga qaytarildi
Fuqaroning hujjatlari yo'qligi sababli u va farzandlari vaqtincha saqlash muassasalarida bo‘lgan.
Sankt-Peterburgda og‘ir vaziyatga tushib qolgan O‘zbekiston fuqarosi va uning olti nafar farzandining vatanga qaytishiga yordam ko‘rsatildi. Bu haqda “Dunyo” AA xabar berdi.
Ma’lum qilinishicha, O‘zbekiston Bosh konsulxonasi diplomatlari Migratsiya agentligi vakillari bilan hamkorlikda M.M. va uning farzandlariga ko‘maklashgan.
Avvalroq fuqaro va uning farzandlarida shaxsini tasdiqlovchi hamda Rossiyadan chiqish huquqini beruvchi hujjatlar bo‘lmagan. Shu sababli M.M. Rossiyadagi xorijiy fuqarolarni vaqtincha saqlash muassasasiga, uning olti nafar farzandi esa “Tranzit” bolalar ijtimoiy boshpanasiga joylashtirilgan.
Farzandlaridan uzoq vaqt ajralib qolishining oldini olish maqsadida zarur hujjatlar qisqa muddatda rasmiylashtirilgan.
Shundan so‘ng M.M. va uning olti nafar farzandi “Sankt-Peterburg – Samarqand” aviaqatnovi orqali O‘zbekistonga qaytarilgan.
