Ukraina Rossiyaga yuzlab dronlar bilan hujum qildi: Wildberries omborida yong‘in chiqdi
Hujum oqibatida 6 kishi halok bo‘ldi. Moskva va boshqa hududlardagi ayrim aeroportlar faoliyati cheklandi.
Ukraina 16-avgust kuni Rossiya hududlariga yuzlab dronlar bilan hujum uyushtirdi. Rossiya rasmiylariga ko‘ra, hujumlar oqibatida kamida 6 kishi halok bo‘lgan. Mazkur hujum Kiyev tomonidan urush boshlanganidan buyon Rossiyaga qarshi amalga oshirilgan eng yirik havo hujumlaridan biri bo‘lgan.
Rossiya Mudofaa vazirligi bir kecha davomida Ukraina tomonidan uchirilgan 822 ta dron yo‘q qilinganini ma’lum qildi. Moskva meri Sergey Sobyaninning aytishicha, poytaxt tomon yo‘nalgan qariyb 600 ta dron aniqlangan. Ularning uchdan biri Moskva viloyati hududida urib tushirilgan.
Moskva viloyati gubernatori Andrey Vorobyovning ma’lum qilishicha, Ukraina droni xususiy uyga kelib urilishi oqibatida 83 yoshli erkak halok bo‘lgan. Shuningdek, hujum oqibatida Rossiyaning yirik chakana savdo kompaniyasi Wildberries’ga tegishli omborda yong‘in chiqqan.
Rossiya OAVlari Podolsk shahrida ombor hududidan ko‘tarilayotgan qalin qora tutun tasvirlarini tarqatdi.
Bundan tashqari, Rostov viloyatining uchta shahri ham hujumga uchragan. Viloyat gubernatori Yuriy Slyusarning ma’lum qilishicha, mazkur hujumlarda 5 kishi halok bo‘lgan.
Rossiya rasmiylari hujum oqibatida Moskva va boshqa hududlardagi ayrim aeroportlar faoliyatiga vaqtinchalik cheklovlar kiritilganini bildirgan.
