Rossiya raketa zarbasi oqibatida Ukrainada 10 kishi halok bo‘ldi
Hujumda Rossiya tomonidan ikkita kichik Banderol qanotli raketasi qo‘llangan.
Rossiyaning raketa zarbasi Ukraina shimoli-sharqidagi Xarkiv viloyatining Pechenigi qishlog‘iga kelib tushdi. Hujum oqibatida 10 kishi halok bo‘ldi, kamida 18 kishi jarohatlandi. Bu haqda Ukraina Prezidenti Volodimir Zelenskiyga tayanib, Reuters xabar berdi.
Uning so‘zlariga ko‘ra, zarba qishloqning gavjum markaziy qismiga, pochta bo‘limi, do‘kon va kafe joylashgan hududga berilgan.
Xarkiv viloyati gubernatori Oleh Sinegubovning ma’lum qilishicha, hujum natijasida 10 ta xususiy uy, pochta bo‘limi, kafe, beshta do‘kon va 15 ta avtomobil zarar ko‘rgan.
Ukraina Bosh prokuraturasi dastlabki ma’lumotlariga ko‘ra, hujumda Rossiya tomonidan ikkita kichik Banderol qanotli raketasi qo‘llangan.
Zelenskiy Rossiyaning hujumiga javob qaytarilishini bildirdi. Rossiya tomoni esa voqea yuzasidan hozircha izoh bermagan.
BMTning Ukrainadagi Inson huquqlarini monitoring qilish missiyasi hujum oqibatlari va tinch aholiga yetkazilgan zarar bo‘yicha ma’lumot to‘playotganini ma’lum qildi.
Rossiya va Ukraina o‘z hujumlarida tinch aholini ataylab nishonga olganini rad etib keladi.
