Rossiya va Ukraina 103 nafardan harbiy asirni almashdi
Ukraina harbiy razvedkasi navbatdagi almashinuv ham oy oxirigacha amalga oshirilishi kutilayotganini ma’lum qildi.
Rossiya va Ukraina 103 nafardan harbiy asirni almashdi. Bu haqda har ikki tomon rasmiylariga tayanib, Reuters xabar berdi.
Ma’lum qilinishicha, Ukraina harbiy razvedkasi oy oxirigacha yana bir asirlar almashinuvi o‘tkazilishi kutilayotganini bildirgan.
Rossiya 2022-yilda Ukrainaga bostirib kirganidan buyon tomonlar muntazam ravishda harbiy asirlarni almashib kelmoqda. Shu bilan birga, urushni yakunlash bo‘yicha kelishuv shartlari yuzasidan Kiyev va Moskva o‘rtasidagi pozitsiyalar hamon bir-biridan keskin farq qiladi.
Ukraina Prezidenti Volodimir Zelenskiyning Telegram’dagi sahifasida qayd etilishicha, Rossiyadan qaytarilgan ukrainalik harbiylar orasida Qurolli Kuchlar, Davlat chegara xizmati va Milliy gvardiya xizmatchilari bor.
Rossiya tomonidagi almashinuv haqida esa Interfaks agentligi Mudofaa vazirligiga tayanib xabar berdi.
Uch yil davomida asirlikda bo‘lgan 29 yoshli ukrainalik Dmytro Reuters agentligiga uyiga qaytganidan xursandligini aytdi. U hali ham asirlikda qolayotgan harbiylarning oilalarini umidni yo‘qotmaslikka chaqirdi.
28 oy davomida asirlikda bo‘lgan 43 yoshli ukrainalik harbiy Anton Timosenko esa asirlik davrida ular uchun eng muhim narsa qarindoshlaridan kelgan xatlar bo‘lganini aytdi. Har ikki harbiy ham urushning qaysi hududlarida jang qilgani haqida ma’lumot bermagan.
Ukraina harbiy razvedkasi rahbari Oleg Ivashchenko navbatdagi almashinuv oy oxirigacha amalga oshirilishi kutilayotganini ma’lum qildi. Uning so‘zlariga ko‘ra, keyingi almashinuvda uzoq vaqt davomida asirlikda saqlangan harbiylar, jumladan, urushning dastlabki bosqichida Rossiya qamal qilgan Mariupol shahri mudofaasida qatnashgan ukrainalik himoyachilarni qaytarish kutilmoqda.
