O‘zbekistonda xorijiy investitsiyalar hajmi yiliga 40–50 milliard dollarga yetdi

Prezident Shavkat Mirziyoyev O‘zbekiston davlat mustaqilligining 35-yilligiga bag‘ishlangan tantanali marosimda mamlakat iqtisodiyotidagi o‘zgarishlar va erishilgan natijalar haqida so‘zladi.

 

Davlat rahbari katta siyosiy iroda bilan O‘zbekiston dunyoga keng ochilgani, qo‘shni davlatlar bilan chegara masalalari hal etilib, do‘stlik va hamkorlik aloqalari mustahkamlanganini ta’kidladi.

 

Valyuta, soliq, bojxona va investitsiya siyosatida tub o‘zgarishlar amalga oshirilgani qayd etildi. Natijada O‘zbekistonning Iqtisodiy erkinlik indeksidagi o‘rni 80 pog‘onaga yaxshilanib, mamlakat iqtisodiyoti mo‘tadil erkin davlatlar qatoridan joy olgani aytildi.

 

Ilgari O‘zbekistonga yiliga 2–3 milliard dollar miqdorida xorijiy investitsiya jalb qilingan bo‘lsa, hozir bu ko‘rsatkich 40–50 milliard dollarga yetgani ta’kidlandi. Investitsiyalar bilan birga ilg‘or texnologiyalar, zamonaviy bilim va yangi iqtisodiy imkoniyatlar kirib kelayotgani qayd etildi.

 

Shuningdek, uch yil avval 2030-yilda yalpi ichki mahsulot hajmini 160 milliard dollarga yetkazish maqsadi belgilangan bo‘lsa, global logistika tizimidagi uzilishlar va dunyodagi notinch vaziyatga qaramay, ushbu marraga joriy yilning o‘zidayoq ortig‘i bilan erishilgani ma’lum qilindi. Natijada O‘zbekiston daromadi o‘rtachadan yuqori davlatlar qatoriga kirishi qayd etildi.

 

Prezident bunday natijalarga xalqning fidokorona mehnati, intellektual salohiyati hamda millat va davlat birdamligi tufayli erishilayotganini ta’kidladi.

 

Shuningdek, yangi davrda 650 mingdan ziyod oila zamonaviy uy-joyga ega bo‘lgani qayd etildi.

 

Tantana davomida minglab mahallalarga Yangi O‘zbekiston qiyofasi kirib borayotgani, kambag‘allik masalasi ochiq tan olinib, uni keskin qisqartirish bo‘yicha milliy tajriba shakllantirilgani ta’kidlandi.

 

Ehtiyojmand oilalarning daromadi, kasbi, salomatligi, farzandlarining ta’lim olishi va yashash sharoitini yaxshilashga qaratilgan “mahallabay” ishlash tizimi yo‘lga qo‘yildi.

 

Izchil sa’y-harakatlar natijasida kambag‘allik darajasi 2017-yildagi 35 foizdan 4 foizga tushirilgani qayd etildi. Ushbu ko‘rsatkich ortida turmush sharoiti va hayot sifati yaxshilangan 10 million insonning hayoti mujassam ekani ta’kidlandi.