Yangi Toshkent taraqqiyot markaziga aylanadi — Prezident
Mustaqillik bayrami Yangi Toshkentda nishonlanayotgani tantana shukuhini yanada oshirayotgani ta’kidlandi.
Prezident Shavkat Mirziyoyev O‘zbekiston Respublikasi davlat mustaqilligining 35-yilligiga bag‘ishlangan tantanali marosimdagi nutqida xalqimizni bayram bilan samimiy tabriklab, mamlakatning eng ulug‘ bayrami Yangi Toshkentda nishonlanayotgani tantana shukuhini yanada oshirayotganini ta’kidladi.
Qayd etilishicha, kelgusida ilm-fan, ta’lim va madaniyat markaziga aylanishi ko‘zda tutilgan Yangi Toshkentda kuni kecha Yangi O‘zbekiston universiteti, Nizomiy nomidagi O‘zbekiston Milliy pedagogika universiteti hamda O‘zbekiston milliy kutubxonasining yangi binolari foydalanishga topshirildi.
Shuningdek, tantanali marosim doirasida ochiladigan favvora dunyodagi eng baland musiqali favvora sifatida “Ginnessning rekordlar kitobi”dan joy olgani ta’kidlandi.
“Bir necha yuz yillik orzular ro‘yobga chiqayotgan ushbu betakror makonda butun xalqimiz bilan hali yana ko‘plab quvonchli va tarixiy voqealarga guvoh bo‘lamiz. Aminmanki, Yangi Toshkent poytaxtimizning ko‘rkiga ko‘rk qo‘shib, biz barpo etayotgan Yangi O‘zbekistonning kuch-qudratini namoyon etadigan chinakam taraqqiyot markaziga aylanadi”, – dedi Prezident.
