Toshkentning to‘rt tumanida gaz ta’minoti vaqtincha cheklanadi
Gaz ta’minotidagi vaqtinchalik cheklovlar texnik ishlar yakunlangach bekor qilinadi.
Ta’mirlash va texnik ishlar olib borilishi munosabati bilan 2026-yil 4-sentyabr kuni Toshkent shahrining ayrim hududlarida tabiiy gaz ta’minoti vaqtincha to‘xtatiladi. Bu haqda “Hududgaz Poytaxt” GTF matbuot xizmati ma’lum qildi.
Sergeli tumanida «Qubaytepa» MFY Sadiy ko‘chasidan o‘tgan o‘rta bosimli gaz quvurini xavfsiz hududga ko‘chirish ishlari sabab soat 10:00 dan 17:00 gacha gaz ta’minoti vaqtincha to‘xtatiladi. Mazkur cheklov 356 ta xonadon va 12 ta ulgurji iste’molchiga ta’sir qiladi.
Bektemir tumanida «H. Bayqaro» MFY Yu. Chirchiq ko‘chasidagi gaz taqsimlash punktini yangisiga almashtirish ishlari sabab soat 10:00 dan 18:00 gacha gaz ta’minoti vaqtincha to‘xtatiladi. Ushbu davrda 12 ta xonadon hamda 2-, 3- va 77-sonli ko‘p qavatli uylardagi 116 ta xonadon gaz ta’minotidan uziladi.
Yangihayot tumanida esa «Chortoq» MFY Gulzor 6-tor ko‘chasidagi aholi xonadonlarini gaz ta’minoti tizimini 3 bosqichli tizimdan 2 bosqichli tizimga o‘tkazish va gaz taqsimlash punktini demontaj qilish ishlari olib boriladi. Shu sabab soat 11:00 dan 16:00 gacha 38 ta xonadon va 3 ta ulgurji iste’molchiga gaz yetkazib berish vaqtincha to‘xtatiladi.
Shuningdek, Mirzo Ulug‘bek tumanining ayrim hududlariga ham tabiiy gaz yetkazib berish vaqtincha to‘xtatiladi.
Gaz ta’minoti soat 10:00 dan 17:00 gacha quyidagi hududlarda uziladi:
- «Alisherobod» MFYdagi Anay buloq, Alisherobod, Jo‘shqin, Nihol, Yangi tong va Yangi avlod ko‘chalaridagi 5 ta ko‘p qavatli uy hamda 643 ta xonadon;
- «Yangi Avayxon» MFYning Qorasuv-6 dahasidagi 42 ta ko‘p qavatli uydagi 2 769 ta xonadon;
- mazkur hududlardagi 38 ta ulgurji iste’molchi.
Ta’mirlash ishlari yakunlangach, tabiiy gaz ta’minoti qayta tiklanadi.
Gaz ta’minoti filiali yuzaga keladigan noqulayliklar uchun iste’molchilardan uzr so‘ragan.
