Glinka ko‘chasidagi avariya holati yuzasidan jinoyat ishi qo‘zg‘atildi
Dastlabki ma’lumotlarga ko‘ra, yerosti gaz quvuridan sizib chiqqan gaz issiqlik tarmog‘i kamerasida to‘planishi oqibatida avariya holati yuzaga kelgan.
Toshkent shahar hokimligi Matbuot xizmati Glinka ko‘chasida yuz bergan hodisa yuzasidan qo‘shimcha ma’lumot berdi.
Dastlabki ma’lumotlarga ko‘ra, diametri 219 millimetr bo‘lgan yerosti gaz quvuridan sizib chiqqan gaz issiqlik tarmog‘i kamerasida to‘planishi oqibatida avariya holati yuzaga kelgan.
O‘rganishlar davomida gaz quvurining taxminan 375 kvadrat santimetr (15×25 sm) maydonida bir nechta joydan gaz sizib chiqayotgani aniqlangan.
Ayni paytda tegishli soha mutaxassislari tomonidan hodisaning kelib chiqish sabablari va barcha tafsilotlari batafsil o‘rganilmoqda. Tekshiruv ishlari yakunlangach, shikastlangan yo‘l qoplamasini tiklash ishlari davom ettiriladi.
Yo‘l qoplamasini tiklash ishlari yakunlangach, Glinka ko‘chasida transport harakati qayta tiklanadi.
Mazkur holat yuzasidan jinoyat ishi qo‘zg‘atilgan bo‘lib, hozirda tergov harakatlari olib borilmoqda. Tergov yakunlari bo‘yicha aybdor shaxslarning xatti-harakatlariga qonunchilikda belgilangan tartibda huquqiy baho beriladi.
Hodisa oqibatlarini bartaraf etish, uning sabablarini aniqlash, muhandislik tarmoqlarining holatini o‘rganish hamda kelgusida bunday holatlarning oldini olish masalalari Toshkent shahar hokimligining doimiy nazoratida ekanligi ma'lum qilindi.
