Shavkat Mirziyoyev Jorja Meloniga maktub yo‘lladi

 

Prezident Shavkat Mirziyoyev Italiya Vazirlar Kengashi Raisi Jorja Meloniga maktub yo‘lladi.

 

Davlat rahbari Jorja Melonini Italiya Respublikasi Vazirlar Kengashi Raisi lavozimida shu vaqtga qadar eng uzoq muddat faoliyat yuritgan hukumat rahbari sifatida tarixdan munosib o‘rin olgani bilan samimiy muborakbod etdi.

 

Prezident ushbu natija Jorja Melonining siyosiy irodasi va qat’iyati, davlat boshqaruvidagi mas’uliyatni chuqur his etishi hamda Italiya xalqi tomonidan unga bildirilgan yuksak ishonchning yaqqol ifodasi ekanini ta’kidladi.

 

Maktubda Italiya milliy manfaatlarini qat’iy himoya qilish, mamlakatning Yevropa Ittifoqi va xalqaro maydondagi nufuzi hamda obro‘-e’tiborini yanada mustahkamlash borasida Jorja Meloni olib borayotgan sa’y-harakatlar alohida e’tirof etildi.

 

Shuningdek, Italiya Hukumati rahbarining O‘zbekistonga nisbatan do‘stona munosabati va ikki mamlakat o‘rtasidagi ko‘p qirrali hamkorlikni izchil kengaytirishga qaratayotgan doimiy e’tibori uchun minnatdorlik bildirildi.

 

O‘zbekiston Italiya bilan o‘rnatilgan strategik sheriklik munosabatlarini yuksak qadrlashi qayd etildi. Bugungi kunda siyosiy muloqot, savdo-iqtisodiy va investitsiyaviy hamkorlik, shuningdek, madaniy-gumanitar aloqalar izchil rivojlanib, ikki tomonlama munosabatlar sifat jihatidan yangi bosqichga ko‘tarilayotgani ta’kidlandi.

 

Maktub yakunida Prezident Shavkat Mirziyoyev Jorja Meloniga mustahkam sog‘lik, oilaviy baxt-saodat va mas’uliyatli davlat faoliyatida ulkan muvaffaqiyatlar, do‘st Italiya xalqiga esa tinchlik-osoyishtalik, farovonlik va bardavom ravnaq tiladi.