Uch hududda narkosavdogarlardan 12,7 kg giyohvandlik vositalari olindi
Ushlanganlardan biri sintetik giyohvandlik vositasini qo‘shni davlatdan “Cobalt” avtomobilining yoqilg‘i bakiga yashirib olib o‘tishga uringan.
Davlat xavfsizlik xizmati, Ichki ishlar, Bojxona va Chegara qo‘shinlari xodimlari hamkorligida Toshkent viloyati, Toshkent shahri hamda Namangan viloyatida o‘tkazilgan tezkor tadbirlarda yirik miqdordagi giyohvandlik vositalari aniqlandi. Bu haqda DXX xabar berdi.
Jumladan, Bo‘stonliq tumanida o‘tkazilgan tadbirda Andijon viloyati Marhamat tumanida yashovchi, 2000-yilda tug‘ilgan shaxs boshqaruvidagi “Cobalt” avtomobili to‘xtatilgan. U tadbir ishtirokchilarining qonuniy talabiga bo‘ysunmasdan qochishga uringan va avtomobil salonidagi shubhali moddalarni uloqtirib yuborgan.
Transport vositasi va tegishli geolokatsiya ko‘zdan kechirilishi natijasida jami 5 kg “gashish” giyohvandlik vositasi protsessual tartibda rasmiylashtirib olingan.
Chilonzor tumanida o‘tkazilgan tezkor tadbirda esa 2005-yilda tug‘ilgan xorijiy davlat fuqarosi ushlangan. Uning yonida va vaqtincha yashayotgan xonadonida turli oziq-ovqat mahsulotlari nomi ostida qadoqlangan paketlar aniqlangan.
Ulardan 4 kg 133 gr “3-xlorometkatinon”, 403 gr “Amfetamin”, 720 gr “MDMA” va 20 gr “kokain” giyohvandlik vositalari borligi aniqlangan.
Namangan viloyatining Uchqo‘rg‘on tumanidagi chegara-bojxona postida o‘tkazilgan tadbirda esa Chortoq tumanida yashovchi, 2000-yilda tug‘ilgan shaxs boshqaruvidagi “Lasetti” avtomobili tekshirilgan. Uning yoqilg‘i baki ichidan 2 kg 513 gr “Alfa-PVP” sintetik giyohvandlik vositasi topilgan.
Shuningdek, mazkur shaxs bilan birga chegaragacha kelgan va postni piyoda kesib o‘tib, O‘zbekiston hududida uni kutib turgan 2005-yilda tug‘ilgan chortoqlik sherigi ham ushlandi.
Hozirda uchala holat yuzasidan jinoyat ishlari qo‘zg‘atilib, tergov harakatlari olib borilmoqda.
