AQSh xorijiy davlat xizmatchilari farzandlariga fuqarolik berishni cheklamoqchi
Taklif xorijiy elchixona va konsulliklarning ayrim xodimlari farzandlariga ham taalluqli bo‘lishi mumkin.
AQSh ma’muriyati xorijiy davlat xizmatchilarining farzandlariga tug‘ilish orqali mamlakat fuqaroligini berishni cheklashni taklif qilmoqda. Bu haqda AQSh Ichki xavfsizlik departamentining 4-sentabr kuni Federal reyestrda e’lon qilingan bildirishnomasida ma’lum qilingan.
Departamentning bildirishnomasiga ko‘ra, amaldagi tartibda AQSh hududida tug‘ilgan xorijiy diplomatlarning farzandlari diplomatik maqom sababli avtomatik ravishda AQSh fuqaroligini olmaydi. Shu bilan birga, ular qonuniy doimiy rezident sifatida ro‘yxatdan o‘tish huquqiga ega.
Yangi yondashuvni kamida bir nafar ota-onasi xorijiy davlat xizmatchisi bo‘lgan, tug‘ilgan paytda ota-onasining hech biri AQSh fuqarosi bo‘lmagan bolalarga ham tatbiq etish taklif qilinmoqda.
Departament xorijiy davlat xizmatchilari qatoriga diplomatlardan tashqari, xorijiy elchixonalar va konsulliklarning ayrim xodimlari, shuningdek, ayrim xalqaro tashkilotlar vakillarini ham kiritmoqda.
Mazkur qoidalar 4-sentabrdan kuchga kirishi ko‘zda tutilgan edi. Biroq hozircha AQShda fuqarolik berish amaliyotiga o‘zgartirish kiritilmaydi.
Bunga sabab — 2-sentabr kuni Merilend shtatidagi federal okrug sudi Prezident Donald Trampning tug‘ilish orqali fuqarolikni cheklashga qaratilgan tegishli farmonini vaqtincha to‘xtatib qo‘ygani. Sud mazkur farmon AQSh Oliy sudining avvalgi qaroriga zid bo‘lishi mumkinligini qayd etgan.
Avvalroq, iyun oyida AQSh Oliy sudi Trampning tug‘ilish orqali fuqarolikni cheklashga qaratilgan boshqa farmoni bo‘yicha ham qaror chiqargan edi.
