Erta nikohni “yashirgan” amaldorlar jarimaga tortiladimi?

Bosh prokuratura tomonidan “Voyaga yetmaganlarning nikohi, homiladorligi va tugʻilishi haqida xabar bermaslik uchun jazo choralari belgilanishi munosabati bilan Oʻzbekiston Respublikasining Maʼmuriy javobgarlik toʻgʻrisidagi kodeksiga oʻzgartishlar kiritish toʻgʻrisida”gi qonun loyihasi ishlab chiqilib, jamoatchilik muhokamasiga taqdim etildi.

 

Hujjatga koʻra, Maʼmuriy javobgarlik toʻgʻrisidagi kodeksga yangi — 188-5-modda kiritilishi taklif qilinmoqda. Ushbu modda doirasida davlat organi yoki boshqa tashkilotning mansabdor shaxsi yoxud xodimi oʻziga maʼlum boʻlgan huquqbuzarlik — jumladan, voyaga yetmaganning nikohga kirishi, homiladorligi yoki tugʻilishi haqidagi maʼlumotni ichki ishlar organlariga va Inson ijtimoiy xizmatlar markazlariga topshirmasa, bu holat huquqbuzarlik sifatida baholanadi.

 

Loyihada belgilangan jarima miqdorlari quyidagicha belgilangan.

 

Birinchi marta sodir etilganda:

 

fuqarolar va xodimlar uchun — 3 dan 5 baravar bazaviy hisoblash miqdorigacha (1,32 million soʻmdan 2,2 million soʻmgacha);

 

mansabdor shaxslar uchun — 5 dan 10 baravar bazaviy hisoblash miqdorigacha (2,2 million soʻmdan 4,4 million soʻmgacha).

 

Xuddi shu qoidabuzarlik maʼmuriy jazo qoʻllanilganidan keyin bir yil ichida takror sodir etilsa:

 

fuqarolar va xodimlar uchun — 5 dan 10 baravargacha (2,2 million soʻmdan 4,4 million soʻmgacha);

 

mansabdor shaxslar uchun — 10 dan 15 baravargacha (4,4 million soʻmdan 6,6 million soʻmgacha).

 

Shuningdek, loyihada ushbu modda boʻyicha ishlarni koʻrib chiqishni jinoyat ishlari boʻyicha sudlarning yurisdiktsiyasiga oʻtkazish ham taklif etilmoqda.

 

Hujjat hozircha jamoatchilik muhokamasida boʻlib, yakuniy koʻrinishi muhokama yakunlariga qarab oʻzgarishi mumkin.