Samarqandda bolalar farovonligiga bag‘ishlangan Butunjahon sammiti o‘tkaziladi

2026-yil 21–22-oktyabr kunlari Samarqand shahrida “Bolalar farovonligiga investitsiya: kelajak avlodlar uchun barqaror va adolatli taraqqiyot sari” mavzusida Butunjahon sammiti bo‘lib o‘tadi.

 

Tadbirda 100 dan ortiq mamlakatdan siyosiy yetakchilar, vazirlar, xalqaro tashkilotlar va ekspertlar, biznes hamjamiyati, fuqarolik jamiyati, akademik doiralar vakillari, shuningdek, bolalar va o‘smirlar ishtirok etishi kutilmoqda.

 

Sammitda mojarolar, iqlim o‘zgarishi, iqtisodiy beqarorlik va ijtimoiy tengsizlik kabi global muammolarning bolalar hayotiga ta’siri muhokama qilinadi.

 

Tadbir kun tartibidan bolalar manfaatlarini ko‘zlagan ijtimoiy himoya tizimini rivojlantirish, bolalarni himoya qilish va ularga kompleks ko‘mak ko‘rsatish, barqaror va qulay sog‘liqni saqlash tizimini shakllantirish, bolalar saratoniga qarshi kurash, erta bolalik rivoji hamda inklyuziv ta’lim bo‘yicha hamkorlikni kuchaytirish masalalari o‘rin oladi.

 

Sammit doirasida II xalqaro bolalar onkologiyasi kongressini o‘tkazish ham rejalashtirilgan.

 

Tadbir yakunida bolalar farovonligiga investitsiya qilish bo‘yicha Samarqand deklaratsiyasi qabul qilinishi ko‘zda tutilgan. Hujjat bolalar manfaatlarini ta’minlash borasidagi aniq choralar va xalqaro hamkorlikni kuchaytirishga qaratiladi.

 

Butunjahon sammiti 21–22-oktyabr kunlari Samarqand shahrida bo‘lib o‘tadi.