Shavkat Mirziyoyev amaliy tashrif bilan Serbiyaga boradi
Belgradda O‘zbekiston va Serbiya rasmiylari hamda ishbilarmonlari ishtirokida biznes forumi o‘tkaziladi.
Prezident Shavkat Mirziyoyev Serbiya Prezidenti Aleksandr Vuchichning taklifiga binoan 7–8-sentabr kunlari ushbu mamlakatga rasmiy tashrif bilan boradi.
Tashrif dasturiga muvofiq, Belgrad shahrida O‘zbekiston va Serbiya davlat rahbarlari o‘rtasida oliy darajadagi muzokaralar o‘tkaziladi. Shuningdek, ikki mamlakatning rasmiylari va ishbilarmon doiralari vakillari ishtirokida biznes forumi tashkil etiladi.
Muzokaralar kun tartibidan O‘zbekiston–Serbiya ko‘p qirrali sherikligini yanada mustahkamlash va rivojlantirish masalalari o‘rin olgan.
Savdo-iqtisodiy va investitsiyaviy hamkorlikni kengaytirish, shuningdek, transport, mashinasozlik, yengil va oziq-ovqat sanoati, qishloq xo‘jaligi, farmatsevtika hamda axborot texnologiyalari kabi ustuvor yo‘nalishlarda qo‘shma loyihalarni amalga oshirishga alohida e’tibor qaratiladi.
Tomonlar, shuningdek, tartibli mehnat migratsiyasi sohasida hamkorlikni yo‘lga qo‘yish, hududlararo va madaniy-gumanitar aloqalarni kengaytirish masalalarini muhokama qiladi.
Tashrif yakunida hukumatlararo va idoralararo kelishuvlardan iborat salmoqli hujjatlar to‘plamini qabul qilish ko‘zda tutilgan.
