Toshkentda bir kunda 22 ta YTH sodir bo‘ldi, 4 kishi jarohatlandi

 

4-sentabr kuni Toshkent shahrida jami 22 ta yo‘l-transport hodisasi qayd etildi. Ular oqibatida 4 nafar fuqaro og‘ir tan jarohati olgan.

 

Shuningdek, kun davomida poytaxt yo‘llarida 4 751 ta yo‘l harakati qoidabuzarligi aniqlangan.

 

Toshkent shahar Yo‘l harakatini tashkil etish markazi ma’lumotlariga ko‘ra, 4-sentabr kuni sutka davomida poytaxt ko‘chalarida 1 502 057 ta transport vositasi harakatlangan. Bu 3-sentabr kungi ko‘rsatkichdan 14 807 taga, ya’ni 1 foizga ko‘p.

 

Kun davomida jamoat transporti 170 ta yo‘nalishda 1 670 ta avtobus orqali tashkil etilib, 1 228 158 nafar yo‘lovchi tashilgan. Toshkent metropolitenidan esa ish kuni davomida 862 053 nafar yo‘lovchi foydalangan.

 

Tig‘iz vaqtlarda 6 ta chorrahada tirbandlik darajasi 7 ballga, yana 1 ta chorrahada 7 balldan yuqori ko‘rsatkichga yetgan.

 

Tirbandlik kuzatilgan hududlarda transport oqimini barqarorlashtirish maqsadida svetoforlarning ish rejimi muvofiqlashtirilib, ayrim yo‘nalishlarda yashil signal vaqti uzaytirilgan. Shuningdek, harakatni tartibga solish uchun tegishli chorrahalarga YPX xodimlari jalb etilgan.

 

Poytaxt yo‘llaridagi transport oqimi va tirbandlik holati real vaqt rejimida monitoring qilinib, harakat intensivligidan kelib chiqib svetoforlarning ish rejimiga tezkor o‘zgartirishlar kiritib borilmoqda.