“Yana ikkita urushni tugatishga yaqinmiz” — Tramp
AQSh prezidenti Rossiya va Ukraina o‘rtasidagi urush yakuniga yaqinlashayotganini ta’kidladi.
Donald Tramp Rossiya va Ukraina o‘rtasidagi urush hamda AQSh va Eron o‘rtasidagi mojaro yakuniga yaqinlashayotganini bildirdi. Uning aytishicha, har ikki mojaro tez orada tugashi mumkin.
Donald Tramp bu haqda Ayova shtatida tarafdorlari oldida qilgan nutqida ma’lum qildi.
Tramp avval boshlangan yoki boshlanishi mumkin bo‘lgan sakkizta urushni hal qilganini aytib, yana ikkita mojaroga chek qo‘yishga yaqin ekanini ta’kidlagan. U Rossiya va Ukraina o‘rtasidagi urush ham shu bosqichga yaqinlashayotganini bildirgan.
Shuningdek, AQSh prezidenti Eron bilan mojaro ham yaqin orada yakunlanishini taxmin qilgan. Uning so‘zlariga ko‘ra, mojaro qanday yakunlanishidan qat’i nazar, bu jarayon energiya resurslari narxlarining pasayishiga olib kelishi mumkin.
Trampning bayonotiga ko‘ra, urushlarning tugashi neft va benzin narxlariga ham ta’sir ko‘rsatishi kutilmoqda.
Ayni paytda Rossiya prezidenti Vladimir Putin Rossiyaning Ukraina bo‘yicha uch tomonlama muzokaralarga qaytishga tayyorligini bildirgani haqida xabarlar tarqalgan. Tinchlik kelishuvi doirasida xavfsizlik masalalarini muhokama qilish ham kutilmoqda.
