Buxoroda 7 ta dorixonada noqonuniy savdoda bo‘lgan 101 turdagi dori vositasi aniqlandi

Buxoro viloyatidagi 7 ta dorixonada muvofiqlik sertifikatiga ega bo‘lmagan 101 turdagi hamda yaroqlilik muddati o‘tgan 5 turdagi dori vositasi savdoda ekani aniqlandi. Dorilar “Arzon apteka bot” ilovasidagi e’lonlar asosida o‘tkazilgan nazorat tadbirlari davomida savdodan olindi.

 

Farmatsevtika mahsulotlari xavfsizligi markazi ma’lumotiga ko‘ra, nazorat tadbirlari “Berodual”, “Aktovegin” va “Kalimin 60 H” dori vositalarining noqonuniy realizatsiyasi bo‘yicha ilovaga joylashtirilgan e’lonlar asosida o‘tkazilgan.

 

O‘rganishlar davomida davlat ro‘yxatidan o‘tkazilmagan va O‘zbekistonda tibbiyot amaliyotida qo‘llashga ruxsat etilmagan mazkur dori vositalari savdosi bilan bog‘liq holatlar aniqlangan.

 

Savdodan olingan dori vositalari laboratoriya ekspertizasidan o‘tkazilmoqda. Aniqlangan holatlarga huquqiy baho berish yuzasidan tegishli ishlar olib borilmoqda.

 

Shuningdek, “Arzon apteka bot” ilovasida dorixona sifatida ko‘rsatilgan “Online 5” subyekti faoliyati ham o‘rganilgan. Buxoro shahri, Bahovuddin Naqshband ko‘chasi, 309/1-uy manzilida dorixona emas, balki “BTS” tezkor pochta xizmatining Buxoro viloyati ofisi faoliyat yuritayotgani aniqlangan.

 

Markaz “Arzon apteka bot” kabi platformalarda dori vositalari va ularni sotuvchi subyektlar haqidagi ma’lumotlarning haqqoniyligi hamda dorixonalarning qonuniy faoliyat yuritishiga e’tibor qaratish zarurligini ta’kidladi.

 

Farmatsevtika mahsulotlari xavfsizligi markazi sifatsiz, qalbakilashtirilgan, davlat ro‘yxatidan o‘tkazilmagan yoki tibbiyotda qo‘llashga ruxsat etilmagan dori vositalari savdosining oldini olish bo‘yicha nazorat tadbirlari boshqa hududlarda ham davom ettirilishini ma’lum qildi.