Shavkat Mirziyoyev Jahon bojxona tashkiloti bosh kotibini qabul qildi
Uchrashuvda bojxona ma’muriyatchiligini takomillashtirish, tizimni raqamlashtirish va xalqaro hamkorlikni kengaytirish masalalari muhokama qilindi.
Shavkat Mirziyoyev 7-sentabr kuni Toshkentda yettinchi Global kinologiya forumida ishtirok etish doirasida O‘zbekistonda bo‘lib turgan Jahon bojxona tashkiloti bosh kotibi Yan Sondersni qabul qildi.
Uchrashuvda bojxona ma’muriyatchiligini takomillashtirish, bojxona organlari salohiyatini mustahkamlash hamda huquqbuzarliklarga qarshi kurashish borasidagi amaliy hamkorlikni yanada kengaytirish masalalari muhokama qilindi.
O‘zbekistonda bojxona sohasida amalga oshirilayotgan islohotlar natijasida eksport yuklarining 94 foizi, import yuklarining esa 87 foizi soddalashtirilgan tartibda rasmiylashtirilayotgani qayd etildi. Deklaratsiyalarni rasmiylashtirish vaqti 20 daqiqagacha qisqartirilgan.
Tomonlar bojxona tartib-taomillarini yanada raqamlashtirish va uyg‘unlashtirish, normativ-huquqiy bazani takomillashtirish, shuningdek, bojxona organlari xodimlarini o‘qitish va malakasini oshirish masalalariga alohida e’tibor qaratdilar.
Mamlakatimizning Jahon savdo tashkilotiga a’zo bo‘lishga tayyorgarligi doirasida bojxona tizimini xalqaro standartlarga muvofiqlashtirish muhimligi ta’kidlandi.
Uchrashuv yakunida hamkorlikni yanada chuqurlashtirish va bojxona ma’muriyatchiligini takomillashtirishga qaratilgan aniq chora-tadbirlarni o‘z ichiga oluvchi “yo‘l xaritasi”ni ishlab chiqish va qabul qilish bo‘yicha kelishuvga erishildi.
