Shavkat Mirziyoyev Xitoy delegatsiyasini qabul qildi
Uchrashuvda O‘zbekistonda Xitoyning yetakchi oliy ta’lim muassasalari filiallarini ochish masalasiga alohida e’tibor qaratildi.
7-sentabr kuni Shavkat Mirziyoyev Xitoy Kommunistik partiyasi Markaziy qo‘mitasi Xalqaro aloqalar bo‘limi mudiri Lyu Xaysin boshchiligidagi Xitoy Xalq Respublikasi delegatsiyasini qabul qildi.
Uchrashuvda Lyu Xaysin XXR Raisi Si Szinpinning O‘zbekiston Prezidentiga samimiy salomi va ezgu tilaklarini yetkazdi.
Muloqot davomida oliy darajada erishilgan kelishuvlarga muvofiq, O‘zbekiston va Xitoy o‘rtasidagi ko‘p qirrali hamkorlik va amaliy sheriklikni yanada kengaytirish masalalari muhokama qilindi.
So‘nggi yillarda ikki davlat o‘rtasidagi barcha sharoitlarda har tomonlama strategik sheriklik munosabatlari yangi, yuqori bosqichga ko‘tarilgani qayd etildi.
O‘zaro tovar ayirboshlash va investitsiyalar hajmi izchil oshib borayotgani, Xitoyning yetakchi kompaniyalari ishtirokidagi qo‘shma loyihalar va korxonalar soni ortayotgani ta’kidlandi.
Uchrashuvda, shuningdek, parlamentlararo va partiyalararo aloqalarni mustahkamlash, oliy va kasbiy ta’lim sohasidagi hamkorlikni rivojlantirish masalalariga alohida e’tibor qaratildi. Xitoyning yetakchi oliy ta’lim muassasalari filiallarini O‘zbekistonda ochish muhimligi qayd etildi.
Tomonlar parlamentlararo va partiyalararo hamkorlikni kengaytirish bo‘yicha qo‘shma “yo‘l xaritasi”ni qabul qilishga kelishib oldilar.
