Toshkentdan Mavrikiyga to‘g‘ridan-to‘g‘ri reyslar yo‘lga qo‘yiladi
Dastlab dekabr va yanvar oylarida jami to‘rtta reys amalga oshirilishi rejalashtirilgan.
2026-yil 26-dekabrdan Toshkent — Mavrikiy yo‘nalishida ilk bor to‘g‘ridan-to‘g‘ri aviaqatnovlar yo‘lga qo‘yiladi. Dastlab dekabr va yanvar oylarida jami to‘rtta reys amalga oshirilishi rejalashtirilgan. Bu haqda O‘zbekiston va Mavrikiy turizm tadbirkorlari ishtirokida o‘tkazilgan ikki tomonlama muloqotda ma’lum qilindi.
Tadbir “Prestige Travel” kompaniyasi tashabbusi bilan Turizm qo‘mitasi hamkorligida tashkil etilgan. Unda Mavrikiyning turizm kompaniyalari va mehmonxona brendlari vakillari, shuningdek, O‘zbekiston turoperatorlari qatnashgan.
2027-yil iyunidan Toshkent — Mavrikiy yo‘nalishida haftasiga bir marta muntazam aviaqatnovlarni amalga oshirish ko‘zda tutilmoqda.
Yangi yo‘nalish orqali Toshkentning Markaziy Osiyo va MDH davlatlaridan Mavrikiyga yo‘lovchilarni yo‘naltiruvchi tranzit markaz sifatidagi salohiyatini oshirish maqsad qilingan. Xususan, Qozog‘iston, Rossiya va boshqa MDH davlatlari fuqarolarining Toshkent orqali Mavrikiyga borishi uchun imkoniyat yaratiladi.
Shuningdek, to‘g‘ridan-to‘g‘ri qatnovlar ikki mamlakat o‘rtasidagi turistik almashinuvni kengaytirishi kutilmoqda. Mavrikiydan O‘zbekistonga sayyohlarni jalb qilish uchun Samarqand, Buxoro, Xiva va Toshkentning tarixiy-madaniy merosi, islom sivilizatsiyasi bilan bog‘liq qadamjolar hamda milliy oshxonaga asoslangan turistik mahsulotlarni taklif etish rejalashtirilmoqda.
Aviaqatnovlar “Ochiq turizm mavsumi” dasturi doirasida yo‘lga qo‘yilmoqda. Dastur doirasida yangi yo‘nalish ochayotgan aviatashuvchilarga har bir jalb qilingan xorijiy turist uchun 100 dollar subsidiya va aeroport xizmatlarida 20 foizlik chegirma berilishi, mahalliy turoperatorlarga esa uzoq xorijdan jalb qilingan har 1000 turist uchun 5000 dollar subsidiya ajratilishi ko‘zda tutilgan.
