Tramp Putin va Zelenskiy bilan telefon orqali gaplashishi kutilmoqda

 

AQSH prezidenti Donald Tramp 7-sentabr kuni Rossiya prezidenti Vladimir Putin va Ukraina prezidenti Vladimir Zelenskiy bilan telefon orqali muloqot qilishi kutilmoqda.

 

Censor.NET va boshqa manbalarga ko‘ra, Tramp avval Putin, keyin esa Zelenskiy bilan suhbatlashadi. Qo‘ng‘iroqlardan oldin uning maxsus vakili Stiven Vitkoff va kuyovi Jared Kushner Moskvada hamda Kiyevda o‘tkazilgan uchrashuvlar natijalari haqida prezidentga ma’lumot berishi kutilmoqda.

 

Avvalroq Vitkoff va Kushner Moskvada Vladimir Putin bilan uchrashib, uch soatdan ortiq muzokara olib borgani, keyinchalik esa Kiyevga borib, Vladimir Zelenskiy bilan uchrashgani xabar qilingan edi.

 

Shuningdek, AQSH ma’muriyati Ukraina bo‘yicha yangi tinchlik paketi ustida ishlayotgani aytilmoqda. OAVlarda ushbu rejaga o‘t ochishni to‘liq to‘xtatish, hududiy masalalar, Ukrainada saylov va referendum o‘tkazish, mamlakatning bloklarga qo‘shilmaslik maqomini mustahkamlash, Qurolli Kuchlar sonini cheklash hamda tinchlik shartnomasini xalqaro darajada mustahkamlash kabi ehtimoliy bandlar keltirilmoqda.

 

Biroq mazkur bandlarning Trampning yangi tinchlik rejasiga rasman kiritilgani hozircha tasdiqlanmagan.