Farg‘onada hokimlik lavozimi uchun 210 ming dollar talab qilgan shaxs ushlandi
U fuqaroning ishonchiga kirib, o‘zini O‘zbekiston hakamlik sudi sudyasining yordamchisi sifatida tanishtirgan.
Farg‘onada 210 ming AQSH dollari evaziga fuqaroni Uchko‘prik tumani hokimi lavozimiga tayinlatib qo‘yishni va’da qilgan shaxs ushlandi. Bu haqda Bosh prokuratura huzuridagi Departament xabar berdi.
Ma’lum qilinishicha, fuqaro S. A. fuqaro I. D. ning ishonchiga kirib, o‘zini O‘zbekiston hakamlik sudi sudyasining yordamchisi sifatida tanishtirgan. U yuqori lavozimlarda ishlovchi tanishlari orqali 210 ming AQSH dollari evaziga I. D. ni Uchko‘prik tumani hokimi lavozimiga ishga joylashtirib qo‘yishini va’da qilgan.
Tezkor tadbir davomida S. A. kelishilgan mablag‘ning 100 ming AQSH dollarini olayotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 25, 168-moddasi hamda 28, 211-moddasi bilan jinoyat ishi qo‘zg‘atilgan.
Hozirda holat yuzasidan tergov harakatlari olib borilmoqda.
