Litsenziyalashdagi huquqbuzarliklar haqida xabar berganlar rag‘batlantiriladi
Ularga undirilgan jarimaning 10 foizi miqdorida mukofot beriladi.
O‘zbekistonda litsenziyalash, ruxsat berish va xabardor qilish tartib-taomillariga oid huquqbuzarliklar haqida vakolatli organlarga xabar bergan jismoniy va yuridik shaxslarni pul mukofoti bilan rag‘batlantirish tartibi belgilandi.
Bu Hukumatning 2026-yil 4-sentabrdagi 466-son qarori bilan tasdiqlangan nizomda nazarda tutilgan.
Unga ko‘ra, fuqarolar va yuridik shaxslar litsenziyalash, ruxsat berish hamda xabardor qilish tartib-taomillariga oid aniqlangan huquqbuzarliklar haqida vakolatli organlarga xabar berishi mumkin.
Xabarlar maxsus elektron tizim yoki Adliya vazirligining mobil ilovasi orqali yuboriladi.
Videotexnika vositalari orqali qayd etilgan huquqbuzarlik bo‘yicha taqdim etiladigan foto va videomateriallarda huquqbuzarlikning o‘zi, huquqbuzar haqidagi ma’lumotlar mavjud bo‘lsa, shuningdek, hodisa sodir etilgan sana va vaqt aks etgan bo‘lishi kerak.
Vakolatli organ kelib tushgan xabarni 10 ish kuni davomida ko‘rib chiqadi.
Agar xabarda keltirilgan ma’lumotlar tasdiqlansa va uning asosida vakolatli organ yoki sud tomonidan aybdor shaxsni javobgarlikka tortish to‘g‘risida qaror qabul qilinsa, undirilgan jarimaning 10 foizi miqdorida bir martalik pul mukofoti xabar bergan shaxsga beriladi.
