Ertaga O‘zbekistonda navbatdagi “Avtomobilsiz kun” aksiyasi o'tkaziladi

 

10-sentyabr kuni O‘zbekistonning barcha hududlarida navbatdagi “Avtomobilsiz kun” aksiyasi o‘tkaziladi.

 

Mazkur tashabbus Prezidentning 2026-yil 25-martdagi “Atmosfera havosi sifatini yaxshilashga qaratilgan “Toza havo” umummilliy loyihasini amalga oshirish chora-tadbirlari to‘g‘risida”gi farmoniga muvofiq tashkil etilmoqda. Unga ko‘ra, har oyning 10 va 25-sanalarida “Avtomobilsiz kun”, shuningdek, tegishli muddatlarda “Avtomobilsiz hafta” aksiyalari o‘tkazib kelinmoqda.

 

Aksiya avtotransport vositalaridan atmosferaga chiqariladigan zararli tashlamalarni kamaytirish, ekologik barqaror muhitni shakllantirish hamda jamoat va ekologik toza transport vositalaridan foydalanish madaniyatini keng targ‘ib etishga qaratilgan.

 

Tadbirlar doirasida Ekologiya milliy qo‘mitasi va uning hududiy boshqarmalari xodimlari xizmat hamda shaxsiy avtomobillaridan foydalanish o‘rniga jamoat transporti, velosiped va boshqa muqobil transport vositalaridan foydalanmoqda.

 

Ekologiya qo‘mitasi ma’lumotlariga ko‘ra, mazkur tashabbuslar natijasida atmosferaga chiqariladigan zararli tashlamalarni kamaytirish hamda shaharlardagi transport tirbandliklarini qisqartirishga erishilmoqda.

 

“Avtomobilsiz kun” va “Avtomobilsiz hafta” aksiyalari doirasida davlat fuqarolik xizmatchilarining avtotransport vositalaridan foydalanishi javobgarlikka sabab bo‘ladi.