Xitoy va Rossiya Shimoliy Koreya bilan strategik aloqalarni kuchaytirishini bildirdi
Si Szinpin va Vladimir Putin Kim Chen Inga KXDR tashkil topganining 78 yilligi munosabati bilan yo‘llagan tabrik maktublarida Pxenyan bilan hamkorlikni yana-da rivojlantirishga tayyorligini taʼkidlagan.
Xitoy raisi Si Szinpin va Rossiya prezidenti Vladimir Putin Shimoliy Koreya tashkil topganining 78 yilligi munosabati bilan mamlakat yetakchisi Kim Chen Inga tabrik maktublari yo‘llab, Pxenyan bilan strategik aloqalarni mustahkamlashga tayyor ekanini bildirgan. Bu haqda Shimoliy Koreya davlat axborot agentligiga tayanib, Reuters xabar qildi.
Si Szinpin maktubida Xitoy Shimoliy Koreya bilan munosabatlarni strategik jihatdan rivojlantirishni davom ettirish va ikki davlat taraqqiyotini ilgari surish uchun Kim Chen In bilan hamkorlik qilishga tayyorligini bildirgan.
Xitoy rahbari Pekin va Pxenyan o‘rtasidagi aloqalarni mustahkamlash va rivojlantirish Xitoy Kommunistik partiyasi hamda hukumatining «izchil va o‘zgarmas siyosati» bo‘lib qolishini taʼkidlagan. Shuningdek, u iyun oyida Pxenyanga amalga oshirgan tashrifi ikki davlat munosabatlari rivojida «yangi sahifa» ochganini qayd etgan.
Putin esa o‘z maktubida Kim Chen In bilan «eng yaqin hamkorlik»ni davom ettirib, Rossiya va Shimoliy Koreya o‘rtasidagi keng qamrovli strategik sheriklikni yana-da mustahkamlash niyatida ekanini bildirgan.
Rossiya prezidenti Moskva va Pxenyan o‘rtasidagi aloqalar mintaqaviy xavfsizlikni taʼminlash hamda «yana-da adolatli, ko‘p qutbli dunyo tartibi»ni shakllantirishga xizmat qilishini taʼkidlagan.
Si Szinpin va Putinning maktublari Shimoliy Koreya hukmron Ishchilar partiyasining «Rodong Sinmun» gazetasining birinchi sahifasida eʼlon qilingan.
Shimoliy Koreya 9 sentyabr kuni 1948 yilda tashkil topganining 78 yilligini nishonlagan. Keltirilgan maʼlumotlarga ko‘ra, Kim Chen Inga Vyetnam, Laos, Kambodja, Mo‘g‘uliston, Shvetsiya, Belarus, Singapur, Shveysariya va Zimbabve kabi davlatlar rahbarlari ham tabrik yo‘llagan.
