Brakonerlar qarshiligi: inspektor halok bo‘ldi
Marhum "Tabiat himoyachisi" ko‘krak nishoni bilan taqdirlanadi.
Ekologiya va iqlim o‘zgarishi milliy qo‘mitasi Davlat ekologik nazorat inspeksiyasining Sirdaryo suv havzasini nazorat qilish bo‘limi xodimi Mirzo Botirov xizmat vazifasini bajarish vaqtida halok bo‘ldi.
Ma’lum qilinishicha, u 9-sentyabr kuni soat 23:00 atrofida Sirdaryo daryosi o‘zanida o‘tkazilgan tezkor reyd tadbirida elektr qarmoq yordamida noqonuniy baliq ovlayotgan huquqbuzarlarning qarshiligiga uchragan. Natijada inspektor suvga tushib ketgan.
Tegishli tashkilotlar hamkorligida olib borilgan qidiruv ishlari natijasida Mirzo Botirovning jasadi 10-sentyabr kuni topilgan.
Qo‘mita ma’lumotiga ko‘ra, hozirda marhumning oila a’zolariga zarur moddiy va ma’naviy ko‘mak ko‘rsatish, shuningdek, voqeaning barcha tafsilotlarini o‘rganish bo‘yicha choralar ko‘rilmoqda.
Mirzo Botirovning atrof-muhitni muhofaza qilish va ekologik qonunchilik talablarini ta’minlash yo‘lidagi xizmatlari hamda jasorati munosib baholanib, marhum "Tabiat himoyachisi" ko‘krak nishoni bilan taqdirlanadi.
