Jazoir BAA bilan diplomatik aloqalarni uzdi

Jazoir Tashqi ishlar vazirligi 10-sentyabr, payshanba kuni BAA bilan diplomatik aloqalarni uzganini ma’lum qildi. Bu haqda Reuters xabar berdi.

 

Vazirlikka ko‘ra, Abu-Dabining harakatlari endilikda “maqbul yoki chidab bo‘ladigan darajadan oshib ketgan”. Jazoir ikki tomonlama munosabatlarni saqlab qolish uchun “barcha imkoniyatlarni ishga solib bo‘lganini” bildirgan.

 

BAA elchisi Tashqi ishlar vazirligiga chaqirtirilib, unga Jazoirning qarori haqida ma’lum qilingan. Diplomatik vakilga qarorni bajarish uchun 48 soat vaqt berilgan.

 

Jazoirning bayonotidan ko‘p o‘tmay, BAA prezidenti diplomatik maslahatchisi Anvar Gargash X tarmog‘ida diplomatik munosabatlar “jumboqlar va izoh talab qiladigan ishoralar”ga emas, balki “ratsionallik, muloqot va manfaatlarning aniqligi”ga asoslanishi kerakligini aytdi. U Jazoirni bevosita tilga olmagan.

 

Qayd etilishicha, so‘nggi yillarda ikki davlat o‘rtasidagi munosabatlarda keskinlik kuchaygan. Jazoir OAVlari BAAni keskin tanqid qilib, uni mintaqada kelishmovchiliklar keltirib chiqarishga urinishda ayblab kelgan.

 

Reuters yozishicha, Jazoir va BAA qator mintaqaviy masalalarda ham turlicha pozitsiyani egallaydi. Jazoir Isroil bilan munosabatlarni normallashtirishga qarshi. BAA hamda Jazoirning mintaqadagi raqibi Marokash esa 2020-yilda AQSh vositachiligida tuzilgan “Ibrohim kelishuvlari” doirasida Isroil bilan diplomatik aloqalar o‘rnatgan.

 

Shuningdek, ikki davlat G‘arbiy Sahroi Kabir masalasida ham qarama-qarshi pozitsiyada. BAA Marokashning ushbu hudud ustidan suverenitetga egalik qilish haqidagi da’vosini qo‘llab-quvvatlaydi va u yerda konsulligi mavjud. Jazoir esa mustaqil G‘arbiy Sahroi Kabirni tashkil etishni ko‘zlayotgan Polisario frontini qo‘llab-quvvatlaydi.

 

Ikki davlat manfaatlari Sahel mintaqasida ham tobora ko‘proq kesishmoqda. BAA so‘nggi yillarda mintaqadagi bir qator hukumatlar bilan aloqalarini kengaytirgan. Jazoirning janubdagi ayrim qo‘shnilari bilan munosabatlari esa bir qator harbiy to‘ntarishlardan keyin keskinlashgan.

 

Jazoir prezidenti Abdelmajid Tebbun o‘tgan yili mamlakatining barcha Fors ko‘rfazi davlatlari bilan munosabatlari iliq ekanini, faqat bitta davlat bundan mustasno ekanini aytgandi. Bu bayonot BAAga yashirin ishora sifatida baholangan. U Saudiya Arabistoni, Quvayt, Ummon va Qatar bilan munosabatlarni “qardoshlarcha” deb ta’riflab, nomini aytmagan davlatni Jazoirning ichki ishlariga aralashish va mamlakatni beqarorlashtirishga urinishda ayblagan.

 

2026-yil fevralida esa Jazoir BAA bilan 2013-yil may oyida Abu-Dabida imzolangan havo qatnovlari to‘g‘risidagi kelishuvni bekor qilish jarayonini boshlagan.