O‘zbekistonda ish kunlari soat 23:00 dan 07:00 gacha baland shovqin chiqarish taqiqlanadi
Dam olish va ishlanmaydigan bayram kunlari cheklov 22:00 dan 09:00 gacha amal qiladi.
O‘zbekistonda “Aholini shovqinning zararli ta’siridan himoya qilish to‘g‘risida”gi qonun qabul qilindi. Unga ko‘ra, fuqarolarning osoyishtaligi va normal dam olishini buzadigan darajada shovqin chiqarishga ayrim vaqtlarda yo‘l qo‘yilmaydi.
Qonun bilan shovqinning yo‘l qo‘yiladigan darajasi tushunchasi ham belgilandi. Bu sanitariya qoidalari va normalarida belgilangan, odamni sezilarli darajada bezovta qilmaydigan hamda inson organizmida jiddiy o‘zgarishlarga olib kelmaydigan shovqin darajasi hisoblanadi.
Qonunga ko‘ra, yo‘l qo‘yiladigan darajadan yuqori bo‘lgan va fuqarolarning osoyishtaligi hamda normal dam olishiga xalaqit beradigan shovqinlarga turar joylardagi maishiy faoliyat, qurilish ishlari, qurilish texnikasi va transport vositalari, shuningdek, turli transportlarning harakati natijasida yuzaga keladigan shovqinlar kiradi.
Bunday shovqinlar chiqarishga:
- ish kunlari 23:00 dan 07:00 gacha;
- dam olish va ishlanmaydigan bayram kunlari 22:00 dan 09:00 gacha yo‘l qo‘yilmaydi.
Shovqinning zararli ta’siri oqibatida yetkazilgan zarar uchun sud orqali kompensatsiya undirish mumkin.
Qonun rasmiy e’lon qilingan kundan uch oy o‘tgach kuchga kiradi.
