O‘zbekistondan olib chiqib ketilgan madaniy boyliklarni qaytarish bo‘yicha komissiya tuziladi

O‘zbekistondan turli tarixiy davrlarda olib chiqib ketilgan noyob tarixiy yodgorliklar, arxeologik ashyolar, nodir qo‘lyozmalar va san’at asarlarini izlash hamda mamlakatga qaytarish uchun Prezident huzurida maxsus komissiya tuziladi.

 

Bu haqda Prezident Shavkat Mirziyoyevga madaniy merosni asrab-avaylash va rivojlantirish bo‘yicha taqdimotda ma’lum qilindi.

 

Komissiya madaniy boyliklarni tizimli izlash, ularni huquqiy himoya qilish va O‘zbekistonga qaytarish masalalari bilan shug‘ullanishi ko‘zda tutilgan.

 

Taqdimotda, shuningdek, tarixiy meros va zamonaviy infratuzilmani uyg‘unlashtiruvchi yangi loyihalar ham ko‘rib chiqildi. Xususan, an’anaviy usullar va zamonaviy loyihalash, ishlab chiqarish hamda restavratsiya texnologiyalarini birlashtiradigan ixtisoslashtirilgan mozaika markazini tashkil etish taklif etilmoqda. Markaz Toshkent mozaika maktabini saqlash, mutaxassislar tayyorlash va monumental san’atning yangi yo‘nalishini rivojlantirish maydoniga aylanadi. Ichan-qal’a muzey-qo‘riqxonasi hududida “Olloqulixon karvonsaroyi” savdo markazini tashkil etish loyihasi alohida ko‘rib chiqildi. 

 

Savdo nuqtalarining tartibsiz joylashuvi tarixiy obyektlarning vizual yaxlitligini buzishi va turistlar uchun noqulayliklar keltirib chiqarishi qayd etildi. 

 

Yangi loyiha an’anaviy savdo ruhini saqlash, hunarmandlar uchun sharoit yaratish, ko‘rgazma va yarmarkalar o‘tkazish, shuningdek, yangi turistik nuqtani shakllantirishga qaratilgan.