Glinkadagi portlashdan keyin “navbat” yana 10 ta gaz quvurlariga keldi
Hodisadan so‘ng Toshkentning boshqa hududlaridagi gaz tarmoqlarini tekshirish uchun maxsus ishchi guruh tuzildi.
Toshkent shahrining Glinka ko‘chasida yer osti gaz quvuridan sizib chiqqan gaz oqibatida yuzaga kelgan chaqnashdan so‘ng poytaxt hududidagi gaz tarmoqlarini qo‘shimcha tekshirish ishlari olib borilmoqda.
Toshkent shahar hokimligi matbuot xizmatining maʼlum qilishicha, 3 sentyabr kuni Glinka ko‘chasida sodir bo‘lgan hodisadan keyin Toshkent shahar hokimligi topshirig‘iga asosan maxsus ishchi guruh tashkil etilgan. Unga “Veolia Energy Tashkent”, “Toshkent shahar suv taʼminoti”, “Hududgaz Poytaxt” hamda tuman gaz taʼminoti bo‘limlarining tajribali mutaxassislari jalb qilingan.
Tekshiruvlar davomida bugungi kunga qadar o‘rta bosimli gaz quvurlarida 4 ta, past bosimli quvurlarda esa 6 ta gaz sizishi holati aniqlangan. Barcha nosozliklar tezkor ravishda bartaraf etilgan.
Ayni paytda “Hududgaztaʼminot” AJ va boshqa mutasaddi tashkilotlarning mobil laboratoriyalari tomonidan ko‘chaga tutash hududlardagi muhandislik tarmoqlari ham kompleks tekshiruvdan o‘tkazilmoqda.
Shuningdek, Glinka ko‘chasida taʼmirlash va tiklash ishlari yakunlangan. Yo‘l avtomobil harakati uchun to‘liq ochilgan.
Tekshiruv va profilaktika ishlari poytaxtda yuzaga kelishi mumkin bo‘lgan avariya holatlarining oldini olish, aholi xavfsizligini taʼminlash hamda muhandislik infratuzilmasining barqaror ishlashini taʼminlashga qaratilgan.
