Toshkentdagi 400 ta mahallani obod qilish uchun 10 trln so‘mlik dastur ishlab chiqiladi

Toshkent shahridagi 400 ta mahallani “Qichqiriq” mahallasi namunasi asosida obod qilish bo‘yicha 4 yillik, 10 trillion so‘mlik dastur ishlab chiqiladi. Bu haqda Prezident Shavkat Mirziyoyev raisligidagi videoselektor yig‘ilishida ma’lum qilindi.

 

Yig‘ilishda Olmazor tumanida mahalla va ko‘chalarni kompleks rivojlantirish bo‘yicha amalga oshirilgan ishlar ham ko‘rib chiqildi. Yil boshidan tumandagi 9 ta ko‘cha biznes, aholi va sayyohlar uchun jozibador hududga aylantirilgan.

 

Xususan, Qichqiriq mahallasida qisqa vaqt ichida 450 o‘rinli bog‘cha, sport maydonchalari, sayilgoh, amfiteatr, piyodalar yo‘laklari va favvoralar barpo etildi. Natijada 5,5 ming nafar aholi uchun yashash va dam olish sharoitlari yaxshilandi.

 

Mazkur tajribani kengaytirib, Olmazorda yana 8 ta, poytaxtning qolgan 11 ta tumanida esa kamida 3–4 tadan ko‘chada shu kabi ishlarni boshlash belgilandi.

 

Shuningdek, Toshkent shahridagi 100 ta ko‘chani kompleks yangilash uchun 1 trillion so‘m ajratilgan.

 

Har bir tumanda qaysi ko‘cha va mahallada, qachon va qanday o‘zgarishlar amalga oshirilishi aniq belgilanib, bu rejalar mahalliy kengashlarda muhokama qilinishi va aholiga ochiq e’lon qilinishi kerakligi ta’kidlandi.

 

Yig‘ilishda poytaxtning tarixiy qismi — Eski shahar hududini kompleks rivojlantirish masalasi ham muhokama qilindi. Xorijiy kompaniyalarni jalb qilgan holda 1-noyabrga qadar hududni rivojlantirish bo‘yicha yagona konsepsiya va aniq loyihalar portfelini ishlab chiqish topshirildi.

 

Bundan tashqari, Toshkentdagi davlat idoralariga tegishli binolardan samarali foydalanish masalasiga e’tibor qaratildi. Hozir poytaxtda umumiy maydoni 765 ming kvadrat metr bo‘lgan 497 ta ma’muriy bino mavjud.

 

Davlat tashkilotlarini maqbul joylashtirish, bo‘sh va samarasiz foydalanilayotgan maydonlarda savdo, servis, xususiy tibbiyot va ta’lim xizmatlarini yo‘lga qo‘yish zarurligi qayd etildi.

 

Mas’ullarga davlat idoralari binolarini xatlovdan o‘tkazib, maqbul maydonlarni tadbirkorlarga kafolatli shartlarda uzoq muddatli ijaraga berish bo‘yicha amaliy ishlarni tashkil etish topshirildi.