Aholi murojaatlari e’tiborsiz qoldirildi: 151 nafar mansabdor ishdan bo‘shatildi
Bandlik, mahalla, MIB, sog‘liqni saqlash, prokuratura, ijtimoiy himoya va energetika sohalarida murojaatlar bilan ishlashda eng ko‘p kamchilik aniqlangan.
O‘zbekistonda 2026-yilning yanvar-avgust oylarida aholi murojaatlarini ko‘rib chiqishda kamchilikka yo‘l qo‘ygan 151 nafar davlat xodimi lavozimidan ozod etildi. Bu haqda Prezident Xalq qabulxonalari matbuot xizmati ma’lum qildi.
Tahlillarga ko‘ra, sakkiz oy davomida murojaatlar bilan ishlashda yo‘l qo‘yilgan kamchiliklar yuzasidan davlat tashkilotlariga xodimlarga nisbatan chora ko‘rish bo‘yicha 5 486 ta hujjat kiritilgan.
Natijada vazifalarini yetarli darajada bajarmagan 151 nafar xodim lavozimidan ozod etilgan. Yana 833 nafar xodimga hayfsan, 150 nafariga ma’muriy jazo qo‘llangan. Shuningdek, 1 335 nafar xodim rasman ogohlantirilgan, 89 nafari jarimaga tortilgan va 8 nafarining lavozimi pasaytirilgan.
Murojaatlar bilan ishlashda eng ko‘p kamchiliklar bandlik, mahalla, Majburiy ijro byurosi, sog‘liqni saqlash, prokuratura, ijtimoiy himoya va energetika sohalarida aniqlangan.
Prezident Xalq qabulxonalari murojaatlar asosida mas’ullarga nisbatan chora ko‘rish bilan birga, aniqlangan xato va kamchiliklarni bartaraf etish bo‘yicha ham ish olib bormoqda.
Xususan, murojaatlar eng ko‘p kelib tushayotgan 10 ga yaqin tashkilotda amaliy o‘quv seminarlari tashkil etilgan.
