76 ta soxta “prava”: YHXB binosidagi sxema ochildi

Andijon viloyatida haydovchilik huquqiga ega bo‘lmagan fuqarolarga soxta ma’lumotlar asosida haydovchilik guvohnomalari rasmiylashtirib bergan ikki shaxsga sud hukmi o‘qildi. 

 

Sud hujjatlariga ko‘ra, Sh.M. 2023-yildan 2025-yil noyabrigacha Andijon viloyati IIB YHXBning 5-sonli tumanlararo ro‘yxatdan o‘tkazish va imtihon olish guruhida norasmiy yordamchi sifatida ishlagan.

 

U tanishi U.M. bilan birga fuqarolarga pul evaziga haydovchilik guvohnomasi rasmiylashtirib berish sxemasini yo‘lga qo‘ygan. U.M. mijozlarni topgan, Sh.M. esa guvohnomalarni rasmiylashtirish bilan shug‘ullangan.

 

Bunda avval eski namunadagi haydovchilik guvohnomasini yangisiga almashtirgan fuqarolardan olib qolingan hujjatlardagi seriya va raqamlardan foydalanilgan. Ushbu ma’lumotlar haydovchilik huquqiga ega bo‘lmagan mijozlarning ma’lumotlariga bog‘langan va ular tizimda go‘yoki avvaldan haydovchilik guvohnomasiga ega bo‘lgan shaxslar sifatida ko‘rsatilgan.

 

Shundan so‘ng soxta ma’lumotlar YHXXning yagona avtomatlashtirilgan axborot tizimiga kiritilib, yangi namunadagi haydovchilik guvohnomalari chiqarilgan.

 

Sudda Sh.M. har bir guvohnoma uchun 500 dollardan 1000 dollargacha pul olinganini bildirgan. Uning aytishicha, mijozlarni U.M. topib kelgan va pullarni ham u orqali olgan.

 

U.M. esa suddagi ko‘rsatmasida shu yo‘l bilan 50–60 nafarga yaqin fuqaroga guvohnoma chiqarib berilganini aytgan. Biroq sud hujjatlarida jami 76 ta soxta haydovchilik guvohnomasi rasmiylashtirilgani qayd etilgan.

 

Ularning 65 tasi YHXB xodimlaridan biriga, yana 11 tasi boshqa xodimga tegishli login-parollar orqali chiqarilgan.

 

Ish doirasida login-parollaridan foydalanilgan ikki nafar YHXB xodimi ham sudga tortilgan. Biroq ularning soxta guvohnomalar rasmiylashtirilayotganidan xabardor bo‘lgani yoki buning uchun pul olgani isbotlanmagan. Sud ularning login-parol va elektron kalitlar saqlanishini lozim darajada nazorat qilmaganini mansabga sovuqqonlik bilan qarash deb baholagan.

 

Sud hujjatlarida Sh.M. 2024-yilda totalizator o‘ynab, 50 ming dollardan ortiq qarzdor bo‘lib qolgani ham qayd etilgan. U bu haqda YHXB xodimlaridan biriga aytgan.

 

Jinoyat ishlari bo‘yicha Shahrixon tumani sudi hukmiga ko‘ra, Sh.M. Jinoyat kodeksining 228-moddasi 2-qismi “a” va “b” bandlari bilan aybli deb topildi. Unga ish haqining 20 foizini davlat daromadiga ushlab qolgan holda 2 yil axloq tuzatish ishlari jazosi tayinlandi.

 

U.M.ga esa shu modda bilan 3 yil 3 oy ozodlikni cheklash jazosi berildi.

 

Sud, shuningdek, ashyoviy dalil sifatida saqlanayotgan 76 ta soxta haydovchilik guvohnomasini yo‘q qilish haqida qaror chiqargan.