907 kilogrammlik bombalar: AQSH Isroilga 2,8 mlrd dollarlik qurol sotmoqchi

Donald Tramp maʼmuriyati Isroilga umumiy qiymati taxminan 2,8 milliard dollar bo‘lgan yirik qurol-yarog‘ paketini sotishni rejalashtirmoqda. Bu haqda 15 sentyabr kuni The Washington Post AQSH rasmiylariga tayanib xabar berdi.

Rejalashtirilayotgan paketga 2 ming funtlik, yaʼni qariyb 907 kilogrammlik 40 mingta bomba kiritilishi aytilmoqda. Shundan 20 ming donasi MK-84, yana 20 ming donasi BLU-117 bombasidan iborat bo‘lishi rejalashtirilgan. Shuningdek, paket tarkibida yana 20 mingta I-2000 Penetrator jangovar kallagi ham bo‘lishi ko‘zda tutilgan.

Nashr maʼlumotlariga ko‘ra, bitimning katta qismi AQSHning Foreign Military Financing (FMF) dasturi orqali moliyalashtirilishi mumkin. Ushbu mexanizm doirasida AQSH boshqa davlatlarga Amerika qurollarini sotib olish uchun moliyaviy yordam taqdim etadi.

Rejalashtirilayotgan kelishuv allaqachon AQSH Kongressining tegishli qo‘mitalariga norasmiy tarzda maʼlum qilingan. Biroq bitim hali yakuniy tasdiqlanmagan. AQSH maʼmuriyati vakili barcha xorijiy qurol savdolari belgilangan tartibda ko‘rib chiqilayotganini bildirgan.

Mazkur qurollar avval ham AQSH va Isroil o‘rtasidagi munosabatlarda muhokama markazida bo‘lib kelgan. 2024 yilda Jo Bayden maʼmuriyati G‘azo sektorida tinch aholi orasida katta talafotlar yuz berishi mumkinligidan xavotir bildirib, 2 ming funtlik bombalarning bir partiyasini yetkazib berishni vaqtincha to‘xtatgan edi. Donald Tramp 2025 yil yanvar oyida prezidentlik lavozimiga qaytganidan so‘ng ushbu cheklovni bekor qilgan.

The Washington Post maʼlumotiga ko‘ra, agar rejalashtirilayotgan paket amalga oshsa, u so‘nggi yillardagi 2 ming funtlik bombalarning eng yirik bir martalik savdolaridan biri bo‘lishi mumkin.

Reuters xabariga ko‘ra, AQSH Davlat departamenti va Isroil elchixonasi bitim yuzasidan hozircha alohida izoh bermagan.