Makka osmonidagi xavf: Pokiston bosh vaziri keskin munosabat bildirdi
Pokiston bosh vaziri Shahboz Sharif Makkai Mukarramaga yo‘naltirilgani aytilgan dron hujumi urinishini keskin qoraladi.
Shahboz Sharif Saudiya Arabistoni bilan birdamligini bildirib, mamlakatning muqaddas qadamjolar xavfsizligini ta’minlash borasidagi sa’y-harakatlarini qo‘llab-quvvatlashini ma’lum qildi.
Saudiya Arabistoni boshchiligidagi Yamandagi koalitsiya ma’lumotiga ko‘ra, 15 sentyabr kuni soat 18:50 atrofida Saudiya havo mudofaasi Makkai Mukarramaning janubida uchuvchisiz qurilmani aniqlab, u shaharning taqiqlangan havo hududiga kirishidan oldin yo‘q qilingan. Saudiya tomoni dron husiylar tomonidan uchirilganini bildirdi.
Pokiston bosh vaziri Saudiya havo mudofaasi kuchlarining tezkor harakatini yuqori baholab, Makkai Mukarrama va Madinai Munavvaraning xavfsizligi butun musulmon dunyosi uchun muhim ekanini ta’kidladi.
Shu bilan birga, husiylar Makkani nishonga olganini rad etdi. Guruh vakillari Saudiya tomonining bu haqdagi bayonotini asossiz deb atab, Yamandan Makkai Mukarrama yoki boshqa islomiy muqaddas maskanlarga tahdid yo‘qligini bildirgan.
Saudiya tomoni esa voqeani Makkai Mukarramaning xavfsizligiga tahdid sifatida baholab, muqaddas masjidlar va ziyoratchilar xavfsizligi «qizil chiziq» ekanini ta’kidlagan.
