Vertolyotlar orqali nazorat: 70 kg giyohvandlik o‘simliklari yo‘q qilindi
Tadbir davomida Andijon, Samarqand va Buxoro viloyatlarida marixuana saqlash hamda kannabis yetishtirish bilan bog‘liq bir nechta holat aniqlandi.
“Qoradori-2026” keng qamrovli tezkor-profilaktik tadbirining ikkinchi bosqichi doirasida respublikaning barcha viloyatlarida vertolyotlar yordamida nazoratli parvozlar amalga oshirildi. Tadbirlar davomida xonadonlarda yetishtirilgan jami 70 kg giyohvandlik o‘simligi belgilangan tartibda yo‘q qilindi.
Ichki ishlar vazirligi Tezkor qidiruv departamenti va uning hududiy bo‘linmalari xodimlari tomonidan o‘tkazilgan tadbirlar davomida bir qator holatlar aniqlangan.
Andijon viloyatining Oltinko‘l tumanida 1967-yilda tug‘ilgan fuqaroning xonadonidan 24 kg marixuana topilgan. Holat yuzasidan Jinoyat kodeksining 273-moddasi 6-qismi “a” bandi bilan jinoyat ishi qo‘zg‘atilgan.
Shu tumanda fermer xo‘jaligi ish boshqaruvchisi 200 kvadrat metr maydonda 520 tup kannabis o‘simligini ekib, parvarishlab kelgani aniqlangan. Unga nisbatan Jinoyat kodeksining 270-moddasi 2-qismi “v” bandi bilan jinoyat ishi qo‘zg‘atilgan.
Izboskan tumanida esa 1977-yilda tug‘ilgan fuqaroning yashash xonadonidan 6 kg 100 gramm marixuana aniqlangan. Mazkur holat yuzasidan ham Jinoyat kodeksining 273-moddasi 6-qismi “a” bandi bilan jinoyat ishi qo‘zg‘atilgan.
Samarqand viloyatining Samarqand tumanida 1981-yilda tug‘ilgan shaxs tomorqasiga 41 tup kannabis ekib, parvarishlab kelgani va 400 gramm marixuana saqlagani aniqlangan. Holat yuzasidan Jinoyat kodeksining 270-moddasi 1-qismi bilan jinoyat ishi qo‘zg‘atilgan.
Buxoro viloyatining Buxoro tumanida esa er-xotin yashash hovlisidagi tomorqada 46 tup kannabis yetishtirgani aniqlangan.
Bundan tashqari, tumandagi yana bir xonadonda 42 kvadrat metr maydonda 53 tup kannabis o‘simligi yetishtirilayotgani aniqlangan. Ushbu holatlar yuzasidan fuqarolarga nisbatan Jinoyat kodeksining 273-moddasi 6-qismi “a” bandi bilan jinoyat ishlari qo‘zg‘atilgan.
Qoradori-2026 tadbirining ikkinchi bosqichi doirasida respublika hududlarida giyohvandlik vositalari bo‘lgan o‘simliklarni aniqlash va yo‘q qilishga qaratilgan tadbirlar davom ettirilmoqda.
