Davomatni sun’iy intellekt nazorat qiladi: Toshkentdagi 26 ta maktabda yangi tizim sinovdan o‘tkazilmoqda

Toshkent shahar hokimligining Vaziyatlar markazida poytaxt maktablarida davomatni nazorat qilish va dars qoldirish holatlarini o‘z vaqtida aniqlash masalalariga bag‘ishlangan yig‘ilish o‘tkazildi. Unda “SI Davomat” tizimining ishlash mexanizmi va Sergeli tumanidagi sinov natijalari muhokama qilingan.

 

Tizim orqali o‘quvchi sababsiz dars qoldirgan taqdirda, uning ota-onasiga SMS-xabarnoma yuboriladi. Mazkur ma’lumot maktab direktori, profilaktika inspektori, Milliy gvardiya xodimi hamda mahalla vakillariga ham avtomatik yetkaziladi.

 

“SI Davomat”ning imkoniyatlari faqat davomatni qayd etish bilan cheklanmaydi. Tizimdagi nutqni tahlil qiluvchi modullar orqali o‘quvchilarning darsdagi faolligi va mavzuga qiziqishi, shuningdek, o‘qituvchining darsni olib borish mahorati va mashg‘ulot sifati kabi ko‘rsatkichlarni tahlil qilish imkoniyati ko‘zda tutilgan.

 

Ushbu ma’lumotlar metodistlar tomonidan o‘rganilib, baholab boriladi. Tahlil natijalariga ko‘ra ta’lim sifatini oshirish, shuningdek, o‘qituvchi va o‘quvchilarni rag‘batlantirish yoki tegishli choralarni qo‘llash mexanizmlarini joriy etish rejalashtirilmoqda.

 

Hozirda tizim Sergeli tumanidagi 26 ta maktabda sinovdan o‘tkazilmoqda. Mazkur maktablarda jami 446 ta smart kamera o‘rnatilgan.

 

“SI Davomat” “ERP Maktab” hamda Sog‘liqni saqlash vazirligining DMED tizimlari bilan integratsiya qilingan. Bu orqali o‘quvchining kasalligi sababli darsga kelmagani bilan sababsiz dars qoldirgan holatlarni farqlash imkoniyati yaratiladi.

 

Shuningdek, maktablar davomat ko‘rsatkichlariga qarab “yashil”, “sariq” va “qizil” toifalarga ajratiladi.

 

Sergeli tumanidagi sinov natijalari asosida “SI Davomat” tizimini Toshkent shahridagi boshqa umumta’lim maktablarida ham bosqichma-bosqich joriy etish rejalashtirilmoqda.