Saida Mirziyoyeva “O‘zbekfilm” kinostudiyasini rivojlantirish bo‘yicha rejalarini ma’lum qildi
Saida Mirziyoyeva Abu Ali ibn Sinoning bolaligi haqidagi tarixiy film suratga olinayotgan maydonda ham bo‘ldi.
Saida Mirziyoyeva “O‘zbekfilm” kinostudiyasiga tashrif buyurib, uning joriy holati va faoliyati bilan tanishdi. U kinostudiyani zamonaviy O‘zbekiston kino industriyasining milliy brendi va tayanch markaziga aylantirish zarurligini ta’kidladi.
Uning qayd etishicha, buning uchun kino sohasidagi boshqaruv tizimini o‘zgartirish kerak. Davlat filmning ijodiy jarayoniga aralashadigan buyurtmachi emas, balki sohani rivojlantiruvchi va moliyaviy qo‘llab-quvvatlovchi strategik hamkor bo‘lishi lozim.
Shuningdek, xususiy kinostudiyalar, mustaqil prodyuserlar va ijodkorlarni industriyaning asosiy harakatlantiruvchi kuchiga aylantirish rejalashtirilmoqda. Kino ishlab chiqarishdan tortib tomoshabinga yetkazishgacha bo‘lgan jarayon, jumladan, moliyalashtirish, distributsiya, prokat, festivallar va eksport tizimini zamonaviy talablar asosida yangilash ko‘zda tutilgan.
Milliy kino merosini saqlash, filmlarni restavratsiya qilish va raqamlashtirish tizimini kuchaytirish, yangi avlod ijodkorlarini tayyorlash hamda xalqaro tajriba almashinuvini kengaytirish ham ustuvor yo‘nalishlar sifatida qayd etildi.
Saida Mirziyoyeva sohada professional muhit va o‘zini o‘zi boshqarish madaniyatini shakllantirish, kinoijodkorlarning fikri, tajribasi va kasbiy obro‘sini munosib qadrlash muhimligini ta’kidladi.
Tashrif davomida u Abu Ali ibn Sinoning bolaligi haqidagi tarixiy film suratga olinayotgan maydonda ham bo‘ldi. Ulkan dekoratsiyalar va ijodiy jamoaning ish jarayoni bilan tanishdi.
