Ishga yuborish va “Umra” va’dasi: ikki hududda firibgarlik holatlari aniqlandi
Namanganda ikki fuqaroni Xorvatiyaga ishga yuborish, Farg‘onada esa ikki kishini “Umra” ziyoratiga yuborish evaziga pul talab qilgan shaxslar ushlandi.
Namangan va Farg‘ona viloyatlarida fuqarolarni xorijga ishga yuborish hamda “Umra” ziyoratini tashkil etish va’dasi bilan pul talab qilgan shaxslar fosh etildi.
Jumladan, Namangan shahrida yashovchi, 2004-yilda tug‘ilgan shaxs To‘raqo‘rg‘on tumanida istiqomat qiluvchi ikki fuqaroning ishonchiga kirib, ularni tanishlari yordamida Xorvatiyaga ishga yuborishni va’da qilgan. Buning evaziga u ulardan 3600 AQSH dollari talab qilgan.
Davlat xavfsizlik xizmati va Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbir davomida mazkur shaxs oldindan 1000 AQSH dollari olayotgan vaqtida ashyoviy dalillar bilan ushlangan.
Yana bir holat Farg‘ona viloyatining Buvayda tumanida qayd etilgan. 1969-yilda tug‘ilgan shaxs tegishli vakolatga ega bo‘lmagan holda ikki nafar mahalliy fuqaroni Saudiya Arabistoniga “Umra” ziyoratiga yuborishni va’da qilib, buning evaziga 2200 AQSH dollari olgan.
DXX va IIB xodimlari tomonidan o‘tkazilgan tadbir davomida uning noqonuniy harakatlariga chek qo‘yilgan.
Hozirda har ikki holat yuzasidan Jinoyat kodeksining 168-moddasi (firibgarlik) bilan jinoyat ishlari qo‘zg‘atilgan. Tergov harakatlari davom ettirilmoqda.
