O‘zbekistonda yangi texnikum tashkil etiladi: qutqaruvchilar tayyorlanadi
Muassasa 2027/2028-o‘quv yilidan faoliyat boshlaydi. Unda maktab bitiruvchilari davlat granti va kontrakt asosida tahsil olishi mumkin.
O‘zbekistonda Favqulodda vaziyatlar vazirligi akademiyasi huzurida Qutqaruvchilarni tayyorlash texnikumi tashkil etiladi. Muassasa 2027/2028-o‘quv yilidan faoliyat boshlaydi. Bu haqda 6-noyabr kuni qabul qilingan hukumat qarorida belgilangan.
Texnikumga umumiy o‘rta ta’lim muassasalari bitiruvchilari davlat granti va to‘lov-kontrakt asosida qabul qilinadi. Ta’lim jarayoni boshlang‘ich, o‘rta va o‘rta maxsus kasbiy ta’lim dasturlari asosida tashkil etiladi.
2029-yildan boshlab texnikumning kasbiy ta’lim yo‘nalishlarini tamomlagan bitiruvchilar orasidan favqulodda vaziyatlar organlari uchun kadrlar zaxirasi shakllantiriladi.
Muassasaning asosiy vazifalaridan biri zamonaviy nazariy bilim va amaliy ko‘nikmalarga ega qutqaruvchilarni tayyorlashdan iborat. Buning uchun o‘quv jarayonida simulyatsiya, imitatsiya va virtual laboratoriyalar hamda poligonlardan foydalanish rejalashtirilgan.
