“Xitoy va AQSh raqib emas, hamkor bo‘lishi kerak” — Si Szinpin

 

Xitoy raisi Si Szinpin Xitoy va AQSh raqib emas, balki hamkor bo‘lishi kerakligini ta’kidladi. Bu haqda u AQShga davlat tashrifi munosabati bilan yo‘llagan yozma bayonotida ma’lum qilgan.

 

Si Szinpinning qayd etishicha, Xitoy va AQSh xalqlarining manfaatlari bir-biri bilan chambarchas bog‘liq. Shu bois ikki davlat o‘zaro tushunishni kuchaytirib, barqaror munosabatlarni rivojlantirish uchun birgalikda harakat qilishi kerak.

 

“Xitoy va AQSh raqib emas, balki hamkor bo‘lishi kerak”, degan Xitoy rahbari.

 

Uning ta’kidlashicha, ikki davlat o‘rtasidagi munosabatlarda hamkorlik ustun bo‘lishi, raqobat mo‘tadil darajada qolishi va kelishmovchiliklar nazorat qilinishi lozim. Si Szinpin bunday yondashuv tinchlikka asoslangan barqaror munosabatlarni shakllantirishga xizmat qilishini qayd etgan.

 

Xitoy raisi, shuningdek, mamlakatlarning milliy rivojlanish maqsadlari bir-biriga zid emasligini aytgan. Uning fikricha, Xitoyning milliy tiklanish maqsadi va AQSh prezidenti Donald Tramp ilgari surayotgan “Amerikani yana buyuk qilish” konsepsiyasi bir-birini to‘ldirishi va dunyo uchun manfaatli bo‘lishi mumkin.

 

Si Szinpin Xitoy va AQSh o‘rtasidagi tinch-totuv yashashning tarixiy mantig‘i, ikki xalqning do‘stona munosabatlarga bo‘lgan istagi hamda xalqaro hamjamiyatning ikki davlatdan kutayotgan umidlari o‘zgarmaganini ta’kidladgan.

 

Si Szinpin 23-sentabr kuni AQShga davlat tashrifi bilan yetib kelgan. U va rafiqasi Peng Liyuan Vashington yaqinidagi Endryus aviabazasida Donald Tramp va uning rafiqasi Melaniya Tramp tomonidan kutib olingan. AQSh prezidenti Si Szinpin bilan uchrashuvni kutayotganini bildirgan.

 

Xitoy rahbarining AQShga tashrifi 23–25-sentabr kunlari davom etadi. Ikki davlat rahbarining muzokaralarida Xitoy–AQSh munosabatlari hamda xalqaro masalalar muhokama qilinishi kutilmoqda. Reuters ma’lumotiga ko‘ra, tashrif fonida savdo, texnologiyalar, Tayvan va boshqa masalalar ham kun tartibida turibdi.