“Kulliyoti Navoiy” O‘zbekistonda: nodir merosning faksimile nashri Islom sivilizatsiyasi markaziga taqdim etildi
Kulliyot tarkibida Alisher Navoiyning 26 ta asari jamlangan bo‘lib, uning asl nusxasi Istanbul shahridagi Topqopi saroyi kutubxonasida saqlanadi.
Toshkent shahrida bo‘lib o‘tayotgan «O‘zbekiston–Turkiya madaniyat va sanʼat uchrashuvlari — Turk kino kunlari» madaniy tadbirlari doirasida 24 sentyabr kuni O‘zbekiston madaniyat vaziri Ozodbek Nazarbekov hamda Turkiya Respublikasi madaniyat va turizm vaziri Mehmet Nuri Ersoy poytaxtimizdagi Islom sivilizatsiyasi markaziga tashrif buyurdilar.
Tashrif davomida mehmonlar markaz ekspozitsiyasi bilan tanishib, islom olami tarixi va madaniyatiga oid noyob eksponatlarni tomosha qildilar. Markazda saqlanayotgan tarixiy-madaniy meros namunalari, ularning ilmiy va maʼrifiy ahamiyati haqida maʼlumot berildi.
Tashrif doirasida Turkiya Respublikasi madaniyat va turizm vaziri Mehmet Nuri Ersoy tomonidan Islom sivilizatsiyasi markaziga «Kulliyoti Navoiy» asarining faksimile nashri taqdim etildi.
Maʼlumot o‘rnida, «Kulliyoti Navoiy» Alisher Navoiyning turli janrdagi asarlari jamlangan nodir qo‘lyozma to‘plamdir. Kulliyot tarkibida Alisher Navoiyning 26 ta asari jamlangan bo‘lib, uning asl nusxasi Istanbul shahridagi Topqopi saroyi kutubxonasida saqlanadi.
Mazkur taqdimot Alisher Navoiyning boy adabiy merosini asrab-avaylash, o‘rganish va keng targ‘ib etish, shuningdek, ikki mamlakat o‘rtasidagi tarixiy-madaniy mushtaraklikni yana-da mustahkamlash nuqtai nazaridan muhim ahamiyat kasb etadi.
O‘z navbatida, Islom sivilizatsiyasi markazi tomonidan Mehmet Nuri Ersoyga VIII asrga oid mashhur Katta Langar Qurʼonining faksimile nashri sovg‘a qilindi.
Qayd etish kerak, Katta Langar Qurʼoni Amir Temur davrida O‘zbekistonga olib kelingan. Ushbu kitobning asl nusxasidan 16 sahifa O‘zbekistonda, qolgan 81 sahifa esa Rossiyada saqlanmoqda.
Uchrashuv davomida O‘zbekiston va Turkiya o‘rtasida madaniyat va sanʼat sohasidagi hamkorlikni yana-da rivojlantirish, qo‘shma loyihalarni amalga oshirish hamda ikki mamlakat madaniy muassasalari o‘rtasidagi aloqalarni kengaytirish masalalari yuzasidan fikr almashildi.
Mazkur tashrif O‘zbekiston–Turkiya o‘rtasidagi madaniy-gumanitar aloqalarni mustahkamlash, ikki xalqning mushtarak tarixiy va madaniy merosini o‘rganish hamda keng targ‘ib etish yo‘lidagi muhim qadamlardan biri bo‘ldi.
