Xitoy va AQSh savdo bojlarini 30 mlrd dollarga kamaytirishga kelishdi: tomonlar AI bo‘yicha muloqot boshlaydi

Xitoy va AQSh o‘rtasida o‘zaro bojlarni 30 mlrd dollarga kamaytirish hamda sun’iy intellekt bo‘yicha muloqot boshlash to‘g‘risida kelishuvga erishildi. Bu haqda Xitoy Tashqi ishlar vazirligiga tayanib, Reuters xabar berdi.

 

Kelishuv XXR raisi Si Szinpinning Vashingtonga tashrifi davomida erishilgan sakkiz banddan iborat konsensus doirasida tuzilgan. Tomonlar, shuningdek, savdo kengashini tashkil etish va Kuala-Lumpurdagi avvalgi muzokaralar natijalarini davom ettirishga kelishib olgan.

 

Avvalroq Xitoy va AQSh noyabr oyining 10-kunida yakunlanishi kerak bo‘lgan savdo sulhini yana ikki oyga uzaytirgan edi. AQSh Moliya vaziri Skott Bessentga ko‘ra, bu kattaroq savdo kelishuvini ishlab chiqish uchun qo‘shimcha vaqt beradi.

 

Si Szinpin va AQSh prezidenti Donald Tramp o‘rtasidagi uch kunlik sammit juma kuni yakunlangan. Sammitdan so‘ng Si Szinpin Pekinga qaytgan.

 

Xitoy Tashqi ishlar vazirligi, shuningdek, sun’iy intellekt texnologiyalari bo‘yicha ikki davlat o‘rtasidagi almashinuvlarni kuchaytirish va yangi texnologik o‘zgarishlar asosida umumiy kelishuvga erishish zarurligini bildirgan.

 

Tomonlar Osiyo-Tinch okeani iqtisodiy hamkorligi (APEC) yetakchilari yig‘ilishi hamda G20 sammitini o‘tkazishda bir-birini qo‘llab-quvvatlashga ham kelishgan. Har ikki davlat rahbari boshqa tomon mezbonlik qiladigan ushbu tadbirlarda qatnashishni rejalashtirmoqda.

 

Tashqi siyosat masalasida tomonlar Eron yadro qurolini ishlab chiqmaslik bo‘yicha majburiyatini bajarishi kerakligiga kelishgan. Shuningdek, xalqaro suv yo‘llarida hech bir davlat yoki tashkilot tranzit to‘lovlari joriy qilmasligi kerakligi qayd etilgan.