Janubiy Afrikadagi ikkita shaharchada otishma bo‘ldi: 27 kishi vafot etdi

Janubiy Afrikaning ikki shaharchasida sodir bo‘lgan otishmalarda kamida 27 kishi halok bo‘ldi, 20 dan ortiq odam jarohatlandi. Politsiya hodisalar yuzasidan bir nechta gumondorlarni qidirmoqda.

 

Birinchi otishma shanba kuni kechqurun Yohannesburg janubi-g‘arbidagi Vedela shaharchasida sodir bo‘lgan. Tavernada yuz bergan hujum oqibatida kamida 17 kishi halok bo‘lib, 15 kishi jarohatlangan.

 

Politsiya ma’lumotlariga ko‘ra, qurollangan shaxslar avval Taverna tashqarisida to‘plangan odamlarga qarata o‘q uzgan, keyin bino ichiga kirib, otishmani davom ettirgan. Hujum vaqtida ayrim mijozlarning mobil telefonlari ham olib qo‘yilgan.

 

Gumondorlar ikki avtomobilda voqea joyidan qochgan. Hodisa vaqtida yana ikkita avtomobil yoqib yuborilgan. Politsiya sakkiz nafar gumondorni qidirmoqda. Ular AK-47 avtomatlari va to‘pponchalar bilan qurollangani aytilmoqda. Hujum sababi hozircha noma’lum.

 

Ikkinchi otishma yakshanba kuni yarim tundan keyin Keyptaun yaqinidagi Lvandle shaharchasida sodir bo‘lgan. Do‘konga qurollangan shaxslar hujum qilishi oqibatida kamida 10 kishi halok bo‘lgan, 11 kishi yaralangan. Politsiya hodisaga aloqador bir nechta gumondorni qidirmoqda.

 

Mazkur voqealar Durban shahri yaqinidagi uyda uyushtirilgan ziyofatda 11 kishi, jumladan, homilador ayol halok bo‘lgan otishmadan bir necha kun o‘tib sodir bo‘ldi.

 

Janubiy Afrikada o‘qotar qurollar qo‘llanadigan zo‘ravon jinoyatlar muntazam qayd etiladi. Hukumat, ayniqsa, yirik shaharlarda jamoat xavfsizligini ta’minlash va qurol ishlatiladigan jinoyatlarga qarshi kurashni kuchaytirish bo‘yicha bosim ostida qolmoqda.