Paxta yig‘im-terimi mavsumi: mehnat qonunchiligiga rioya etilishi nazorat qilinadi
Mavsum davomida majburiy va bolalar mehnatining oldini olish bo‘yicha monitoring ishlari olib boriladi.
O‘zbekistonda paxta yig‘im-terimi mavsumi davomida mehnat qonunchiligiga rioya etilishi hamda majburiy va bolalar mehnatining oldini olish bo‘yicha monitoring ishlari olib borilmoqda. Bu haqda Kambag‘allikni qisqartirish va bandlik vazirligi xabar berdi.
Ma’lum qilinishicha, buning uchun tegishli tashkilotlar vakillaridan iborat shtab va ishchi guruhlar faoliyati yo‘lga qo‘yilgan. Ular paxta yig‘im-terimi jarayonida mehnat qonunchiligi talablariga rioya etilishini nazorat qiladi.
Ish beruvchilar va fermer xo‘jaliklari xodimlarni majburan mehnatga jalb qilmasligi, bolalar mehnatidan foydalanmasligi hamda mehnat munosabatlarini qonunchilikda belgilangan tartibda rasmiylashtirishi lozimligi qayd etildi.
Shuningdek, ish vaqti, dam olish va mehnatga haq to‘lash bilan bog‘liq talablarning bajarilishi ham nazorat qilinadi.
Mehnat huquqlari buzilgan fuqarolar Davlat mehnat inspeksiyasiga @munosibmehnat_bot orqali yoki 1176 raqami orqali murojaat qilishi mumkin.
