AQSh Iroqdagi 12 yillik operatsiyani tugatdi: koalitsiya kuchlari Erbildan olib chiqildi
Xavfsizlikni ta’minlash bo‘yicha asosiy mas’uliyat esa Iroq tomoniga o‘tdi.
AQSh va koalitsiya hamkorlari Iroqda IShIDga qarshi olib borilgan “Inherent Resolve” operatsiyasini rasman yakunladi. Bu haqda Pentagon bosh matbuot kotibi Shon Parnell ma’lum qildi.
Uning so‘zlariga ko‘ra, koalitsiya kuchlari va harbiy texnikasining Erbil aviabazasidan tartibli ravishda olib chiqilishi Iroqda IShIDni mag‘lub etishga qaratilgan harbiy missiyaning yakunlanganini anglatadi.
Pentagon AQSh boshchiligidagi kampaniya qariyb 12 yil davom etgani va natijada IShID Iroq hamda mintaqada uyushgan harbiy tahdid sifatida mag‘lub etilganini bildirdi.
Endilikda xavfsizlikni ta’minlash bo‘yicha asosiy vazifa Iroq xavfsizlik kuchlari, jumladan, Peshmerga va Iroq Kurdistonidagi boshqa kuchlar zimmasiga o‘tadi. AQSh esa Iroq tomoniga maqsadli harbiy tayyorgarlik va razvedka yordamini davom ettiradi.
Pentagon ma’lumotiga ko‘ra, IShID qoldiqlari hamda Iroq suvereniteti va mintaqaviy barqarorlikka tahdid solayotgan Eron bilan ittifoqdosh qurolli guruhlarga qarshi kurash bo‘yicha asosiy mas’uliyat endi Iroq hukumatiga yuklanadi.
Shu bilan birga, AQSh Iroq bilan terrorizmga qarshi kurash sohasidagi hamkorlikni davom ettirishini ma’lum qildi. Vashington IShIDning Iroq hududida qayta tiklanishiga yo‘l qo‘ymaslik uchun Bag‘dod va boshqa hamkorlar bilan ishlashda davom etadi.
Pentagon vakili AQSh kuchli va suveren Iroqni qo‘llab-quvvatlashini, bu esa ikki davlat o‘rtasidagi savdo-iqtisodiy, diplomatik va xavfsizlik sohalaridagi hamkorlikni yanada rivojlantirish uchun asos bo‘lishini ta’kidladi.
