Qashqadaryoda 4 yoshli qizning o‘limi: oiladagi boshqa bola vasiyga topshirildi
Avvalroq 4 yoshli qizcha o‘gay onasining kaltaklashi oqibatida vafot etgani haqida xabar berilgandi.
Qashqadaryo viloyati Kasbi tumanida 4 yoshli qizning vafoti bilan bog‘liq holat yuzasidan jinoyat ishi qo‘zg‘atilgan. Oiladagi boshqa voyaga yetmagan bolaning xavfsizligini ta’minlash maqsadida u yaqin qarindoshining vasiyligiga topshirildi. Bu haqda Ijtimoiy himoya milliy agentligi xabar berdi. Holat agentlik tomonidan alohida nazoratga olingan.
Hozirda bolaning hayotiy holatini barqarorlashtirish va xavfsizligini ta’minlash uchun ijtimoiy himoya tizimi mutaxassislari tomonidan uning hayotiy holati hamda mavjud xavf omillari baholanmoqda.
Shuningdek, bolaga zarur psixologik yordam ko‘rsatilmoqda, tibbiy ko‘rik tashkil etilmoqda. Bolaning yashash manzili o‘zgargani inobatga olinib, ta’limni uzluksiz davom ettirish bo‘yicha ham tegishli choralar ko‘rilmoqda.
Bundan tashqari, ijtimoiy xodim tomonidan bola bo‘yicha ijtimoiy keys ochilib, individual ijtimoiy xizmatlar rejasi ishlab chiqilmoqda.
Qayd etilishicha, agentlik yaqin qarindoshi qaramog‘iga topshirilgan bolaning xavfsizligi va farovonligini, shuningdek, unga ko‘rsatilayotgan ijtimoiy xizmatlar hamda individual reja ijrosini muntazam nazorat qilib boradi.
