Ekologik ekspertiza xulosasi: uni endi onlayn olish mumkin
Belgilangan to‘lov ham onlayn amalga oshiriladi.
Ekologik ekspertiza xulosasini endi idoralarga bormasdan, my.gov.uz portali orqali elektron shaklda olish mumkin.
Buning uchun portal orqali onlayn ariza to‘ldirib, ekologik loyiha hujjatlarini yuklash lozim. Shundan so‘ng hujjatlar tuman ekologiya bo‘limi va Ekspertiza markazi tomonidan ko‘rib chiqiladi. Belgilangan to‘lov ham onlayn amalga oshiriladi.
Ekspertiza xulosasi tayyor bo‘lgach, uni elektron shaklda yuklab olish mumkin. Xizmatdan foydalanish uchun my.gov.uz portalidagi tegishli xizmat orqali ariza topshiriladi.
Ekologik ekspertiza xulosasi 39 ish kunida taqdim etiladi. Xizmat uchun to‘lov obyekt turiga qarab BHMning 0,3 baravaridan 25 baravarigacha etib belgilangan.
Xulosaning amal qilish muddati hujjat turiga qarab 3 yildan 5 yilgacha bo‘ladi.
