Chiqib ketish uchun pul to‘lanadi: Tailand mamlakatdan chiqish solig‘ini joriy etishni taklif qildi
Dastlab to‘lov faqat havo orqali mamlakatni tark etayotgan yo‘lovchilarga nisbatan qo‘llanadi.
Tailand Moliya vazirligi mamlakatdan chiqib ketayotgan yo‘lovchilardan yangi soliq undirishni taklif qildi. Taklif dastlab havo yo‘li orqali mamlakatni tark etayotgan yo‘lovchilarga nisbatan qo‘llanishi mumkin.
The Nation nashrining qonun loyihasiga tayanib xabar berishicha, yangi chiqish solig‘i miqdori dastlab 1000 baht — taxminan 30 dollarni tashkil etishi taklif qilinmoqda. Qonun loyihasida to‘lovning yuqori chegarasi 5000 baht etib belgilangan.
Taklif ma’qullansa, soliq Tailanddan samolyotda chiqib ketayotgan barcha yo‘lovchilardan, jumladan xorijiy fuqarolardan ham undiriladi. Quruqlik va dengiz orqali mamlakatni tark etayotgan yo‘lovchilar esa dastlab ushbu to‘lovdan ozod qilinadi.
Tailand qirollik oilasi a’zolari va ularning hamrohlari, buddist sangxasining Oliy patriarxi, davlat rahbarlari, rasmiy hukumat mehmonlari hamda ikki yoshgacha bo‘lgan bolalar soliq to‘lashdan ozod etilishi ko‘zda tutilgan.
Shuningdek, tranzit hududidan chiqmaydigan xalqaro tranzit reyslari yo‘lovchilari, ekipaj a’zolari va boshqa transport xodimlari ham to‘lovdan ozod qilinadi.
Yo‘lovchilar mamlakatdan chiqib ketishdan oldin soliqni to‘lashi kerak bo‘ladi. Nashr ma’lumotiga ko‘ra, amaliyotda to‘lovni aviakompaniyalar yoki chipta agentliklari chipta xarid qilish jarayonida undirishlari mumkin.
Soliqni to‘lamaslik uchun uning miqdoridan ikki baravar ko‘p jarima belgilanishi taklif qilinmoqda.
Tailand Moliya vazirligi ushbu tashabbus davlat resurslaridan samaraliroq foydalanish va ehtimoliy favqulodda vaziyatlarga javob berish imkoniyatlarini kengaytirishga qaratilganini bildirgan.
