Misrga borayotgan o‘zbekistonliklar uchun yangi talablar: 1-noyabrdan tartib o‘zgaradi
40 yoshgacha bo‘lganlar oilasi va 5 ming dollar naqd pul bilan, 40 yoshdan oshganlar esa kamida 3 ming dollar mablag‘ bilan safar qilishi shart.
2026-yil 1-noyabrdan O‘zbekiston fuqarolarining Misr Arab Respublikasiga kirishi bo‘yicha yangi tartiblar joriy etiladi. Unga ko‘ra, mamlakatga boruvchi fuqarolar vizani oldindan rasmiylashtirishi va ayrim qo‘shimcha talablarga rioya qilishi kerak bo‘ladi. Bu haqda O‘zbekistonning Misrdagi elchixonasi xabar berdi.
Diplomatik kanallar orqali olingan ma’lumotlarga ko‘ra, O‘zbekiston fuqarolari Misrga safar qilishdan avval kirish vizasini Misrning diplomatik vakolatxonalari orqali olishlari shart. Turistik safarlar vakolatli turoperatorlar orqali tashkil etiladi.
40 yoshgacha bo‘lgan sayyohlar Misrga faqat yaqin oila a’zolari — ota-onasi, turmush o‘rtog‘i yoki farzandlari hamrohligida borishi mumkin. Bunda oila tasarrufida safar davomida kamida 5 ming AQSh dollari miqdorida naqd mablag‘ bo‘lishi talab etiladi.
40 yoshdan oshgan mustaqil sayohatchilar esa kamida 3 ming dollar miqdorida naqd moliyaviy mablag‘ga ega bo‘lishi lozim.
Misrga kirish vaqtida mehmonxona bron qilinganini tasdiqlovchi hujjat, mobil aloqa ma’lumotlari hamda yetarli moliyaviy ta’minotga ega ekanini tasdiqlovchi hujjatlar taqdim etilishi kerak.
Shuningdek, Misr hududida bo‘lish davomida turistlik vizani boshqa turdagi vizaga almashtirish bo‘yicha murojaatlar qabul qilinmaydi.
Belgilangan hujjatlarni to‘liq taqdim etmagan yo‘lovchilar Misrga kiritilmasligi va ularni mamlakatga olib kelgan aviakompaniya orqali ortga qaytarilishi mumkin.
O‘zbekistonning Qohiradagi elchixonasi fuqarolardan Misrga safarlarni rejalashtirishda mazkur talablarni inobatga olishni so‘ragan.
